Tumanda manzilli chora-tadbirlarga binoan birgina o‘tgan yil davomida tumandagi ijtimoiy soha ob’yektlari va davlat idoralarida quvvati 0,8 MVt quvvatga teng bo‘lgan yuzdan oshiq ob’yektga kichik quvvatli quyosh panellari hamda 3,8 ming litr hajmli geliokollektor o‘rnatilgani o‘nlab mehnat jamoalariga katta qulaylik bo‘ldi. 

Joriy yilda ham hududda ijtimoiy soha ob’yektlari va davlat idoralarida kichik quvvatli qayta tiklanuvchi energiya manbalari qurilmalarini o‘rnatish rejasiga muvofiq amalda, shu yil yakuniga qadar yana yuzdan ortiq ijtimoiy soha inshooti va davlat idorasida 0,401 MVt kichik quvvatli quyosh paneli hamda 6,40 ming litr hajmdagi geliokollektorlar o‘rnatish ishlari davom ettirilayotgani ko‘plarni mamnun qilmoqda.  

Shuningdek, yuqoridagi qarorga asosan mahalliy tadbirkorlar hisobidan 1 ta 4 MVt quvvatli kichik FES, ya’ni fotoelektr stansiyasini qurish maqsad qilingan. Bu boradagi ishlar davom ettirilib, tadbirkorlik sub’yektlariga 0,079 MVt kichik quvvatli quyosh paneli o‘rnatilmoqda.

Yaqinda korxona va tashkilotlar bino-inshootlari qatorida "Kumushkent" MFY binosiga ham umumiy quvvati 4 kVt soatga teng 4 ta quyosh paneli o‘rnatilgani qish mavsumida ham muqobil energiyadan bemalol foydalanish imkonini bermoqda. Bu quyosh panellarining o‘ziga xos xususiyati shundaki, ikki tomonlama quvvatlanuvchi monokristal panelga ega bo‘lib, to‘g‘ridan-to‘g‘ri quyosh nuri tushmagan holatda va bulutli kunda ham yorug‘likni o‘zida qabul qilib, qayta ishlash imkoniga ega. 

Xuddi shunday, elektr energiyasini tejash, ta’lim dargohida dars o‘qitish ishlarida muqobil energiyadan samarali foydalanish maqsadida 40-sonli umumta’lim maktabida ham quyosh panellaridan foydalanishga qaror qilindi. Shu maqsadda maskan binosi tomiga 10 kvt soatga teng quyosh panellari o‘rnatildi.

Viloyat hokimligi matbuot xizmati