Kurash: Bosh prokuror kubogi musobaqasining viloyat bosqichi final bahslari va taqdirlash marosimi bo‘lib o‘tdi
2024-10-22 17:00:00 / Yangiliklar
Tadbirda viloyat hokimi Botir Zaripov so‘zga chiqib, mamlakatimizda jismoniy tarbiya va sportning ommaviyligini oshirish, aholi, ayniqsa, mahallalardagi yoshlar o‘rtasida keng targ‘ib etish, qiziqqan sport yo‘nalishlarida shug‘ullanishlari har tomonlama qo‘llab-quvvatlanayotganligini ta’kidladi. Bu borada “Besh tashabbus olimpiadasi” musobaqalarining tashkil qilinayotganini e’tirof etdi va ishtirokchilarga omad tiladi.
E’tirof etish kerakki, so‘nggi yillarda sport sohasida amalga oshirilgan ijobiy ishlar natijasida viloyatda yoshlarni ommaviy sport bilan qamrab olish darajasi 40 foizga yetkazildi.
O‘zbekiston Respublikasi Prezidentining 2020-yil 4-noyabrdagi “Kurash milliy sport turini rivojlantirish va uning xalqaro nufuzini yanada oshirish chora-tadbirlari to‘g‘risida”gi, 2022-yil 19-yanvardagi“Mahallalarda yoshlar bilan ishlash tizimini tubdan takomillashtirish chora-tadbirlari to‘g‘risida”gi hamda 2022-yil 11-apreldagi “Mahallalarda yoshlarni ommaviy sportga jalb qilishni yangi bosqichga olib chiqish chora-tadbirlari to‘g‘risida”gi qarorlari ijrosini ta’minlash maqsadida o‘tkazilgan bosh prokuror kubogi musobaqasining viloyat bosqichida mahalla, sektor, shahar-tumanlar bosqichidan muvaffaqiyatli o‘tgan 200 nafarga yaqin o‘g‘il-qizlar g‘oliblik uchun bellashdi. Xususan, o‘g‘il bolalar 5 ta vaznda, qizlar esa 4 ta vazn toifasida musobaqada ishtirok etdi.
Qiziqarli va teng kurashlarga boy tarzda o‘tgan final bahslaridan so‘ng taqdirlash marosimi tashkil etildi. Unda o‘z vaznida tengsiz deb topilgan yoshlar medal, diplom va qimmatbaho esdalik sovg‘alari bilan taqdirlanishdi. Bundan tashqari, “Besh tashabbus olimpiadasi” doirasida kurash sport turi bo‘yicha Bosh prokuror kubogi musobaqasini tashkil etishda jonbozlik ko‘rsatgan tuman-shahar sektorlari rahbarlari va mas’ullarga viloyat hokimining tashakkurnomalari topshirildi.
Ma’lumot o’rnida: Ushbu sport tadbirida g‘oliblikka erishgan o‘g‘il-qizlar noyabr oyida bo‘lib o‘tadigan respublika bosqichida Buxoro viloyati sharafini himoya qiladi.
Viloyat hokimligi matbuot xizmati