Buxoro viloyati hokimligi

Mazkur chuqurlashtirilgan tibbiy ko‘rik tuman ko‘p tarmoqli markaziy poliklinikasida tashkil qilindi. Buning uchun filialdan endoxirurg, qon-tomir xirurgi, ginekolog, travmatolog, neyroxirurg, bolalar xirurgi, bolalar reanimatologi, ultratovush tomografiyasi vrachi, endoskopist, kardioreanimatolog, anesteziolog-reanimatolog, nevrolog, kardiolog, terapevt, pediatr, toksikolog va operatsion brigada to‘liq steril tibbiy asbob-anjomlar to‘plami hamda mutaxassislar jalb qilindi.  

Ayni paytda respublika Shoshilinch tibbiy yordam markazi Buxoro filiali bilan o‘zaro hamkorlik olib borish, tuman mutaxassislarini tajriba orttirishiga ko‘maklashish, bemorlarga tibbiy yordam standartlariga muvofiq maslahat va diagnostika, davolashni amalga oshirish borasidagi chora-tadbirlar ko‘rilmoqda.  Shuningdek, tibbiy ko‘rik jarayonida markaz to‘g‘risida tushuntirishlar berilib, mahalliy mutaxassislarning tajriba orttirishiga ko‘maklashish orqali amaliy-uslubiy yordam ko‘rsatilmoqda. 

Tibbiy ko‘rikning tuman markazida tashkillashtirilgan birinchi kunida 261 nafar fuqaro shifokorlar tekshiruvidan o‘tkazildilar. Shulardan 78 nafarida turli yo‘nalishdagi kasalliklar alomati namoyon bo‘ldi. Jumladan, 70 foizidan ortig‘ida terapevtik, 20 foizida xirurgik sohadagi va 7 foizida ginekologik hamda 3 foiziga yaqin bolalarda pediatrik kasalliklar mavjudligi aniqlandi. 

Tuman tibbiyot birlashmasi va ko‘p tarmoqli poliklinikada aniqlangan bemorlarni mahalliy va viloyat miqyosidagi davolash muassasalarida sog‘lomlashtirish rejalari tuzildi. Bu orqali sog‘lom turmush tarzini targ‘ib etish, aholini tibbiy xizmat bilan qamrab olish, turli yuqumli kasalliklar xavf omillarini vaqtli aniqlash, aholining tor mutaxassislar va birlamchi bo‘g‘ini orasida samarali integratsiya mexanizmlarini joriy qilish, aholining tibbiyot muassasalariga bo‘lgan ishonchining ortishiga erishish maqsad qilingan.   

Shu kuni chuqurlashtirilgan tibbiy ko‘rikda aniqlangan kasalliklarga binoan 4 nafar bemorda  yuqori texnologik kam invaziv jarrohlik amaliyoti ham  bajarildi. Bu operatsiyalar kasbdoshlar orasida “mahorat darslari” doirasida amalga oshirildi. Chuqurlashtirilgan tibbiy ko‘riklar tumanda davom ettirilmoqda.  

Viloyat hokimligi matbuot xizmati