Buxoro viloyati hokimligi

Statistik ma’lumotlarga nazar solsak, ayni kunda Buxoro viloyati markazi, Kogon shahri, qolaversa, 11 ta tuman markazida jami 65,1 mingdan ziyod aholi xonadonidan iborat bo‘lgan 2166 ta ko‘p kvartirali uy-joy  mavjud bo‘lib, ularda yashovchi aholiga 28 ta boshqaruvchi tashkilot hamda 2 ta uy-joy mulkdorlari shirkati tomonidan texnik xizmat ko‘rsatishni o‘z zimmasiga olgan. Shu boisdan, joriy yilda mavsum oldidan viloyat miqyosida jami 165 ta ko‘p kvartirali uy-joyda aholi talab va murojaatlaridan kelib chiqqan holda qurilish-ta’mirlash ishlari yoz oylaridan boshlangan.  

Jumladan, 62 ta ko‘p qavatli turar joy inshootining 8,9 ming metr kvadrat tom qismini mukammal va joriy ta’mirlash, 248 ta kirish yo‘lagi, 50 ta temir eshik va kodli qulflar o‘rnatish, 163 ta kirish yo‘laklaridagi elektroshitlar, 21 ta uyning fasad qismini ta’mirlash hamda 86 ta uyning yerto‘la qismini tartibga keltirish, 15 ta uyning ichki muhandislik tarmoqlarini ta’mirlash ishlari davom ettirilayotgan bo‘lib, mazkur ishlarga 3 milliard 600 million so‘m mablag‘ yo‘naltirish ko‘zda tutilgan.  

— Bugunga kelib yuqoridagi sarmoya hisobidan jami 165 ta, ya’ni belgilangan ko‘p xonadonli turar joylarning barchasida ta’mirlash ishlari amalga oshirildi, — deydi viloyat qurilish va uy-joy kommunal xo‘jaligi bosh boshqarmasi boshlig‘i Sohib Jumayev. — Jumladan, 64 ta uyning 9,1 ming kvadrat metr tom qismi, 248 ta kirish yo‘lagi, shuningdek, 280 ta elektr taqsimlovchi shit, 86 ta uyning yerto‘la qismidagi muhandislik kommunikatsiyalari, 15 ta uyning ichki muhandislik tarmog‘i va 21 ta uyning fasad qismi ta’mirlanib, 50 ta kodli qulfli temir eshik o‘rnatildi. Shu bilan birga, zamonaviy andozada ta’mirlanayotgan bino-inshootlarga 312 kvadrat metr  framuga oynalari o‘rnatilgani holda 177 ta kirish yo‘lagidagi chiroqlar almashtirilib, 66 ta o‘rindiq o‘rnatilgani bunda yashovchi aholiga qulaylik bo‘ldi. 

Viloyat hokimining tegishli farmoyishi asosida mahalliy budjetdan moliyalashtirilgan 740 million so‘m mablag‘ va boshqaruv servis kompaniyalari sarmoyasi hisobidan “Buxoro elektr tarmoqlari” hududiy korxonasi bilan hamkorlikda, ko‘p xonadonli uylardagi jami 5 ming 442 ta elektr taqsimlovchi shitlarida ta’mirlash ishlari bajarilgan. Qolaversa, joriy yilda 
600 million so‘m mablag‘ evaziga Buxoro shahridagi 2 ta ko‘p xonadonli uyning lift uskunalari yangisiga almashtirib berilgani bu boradagi aholi tashvish-muammosini  bartaraf etdi. 

Bu borada hududdagi ko‘p xonadonli turar joy inshootlarida joriy ta’mirlash, muhandislik-kommunikatsiya tarmoqlarini tartibga keltirish, ta’minotni bir maromda tashkillashtirish, qolaversa, ko‘p qavatli uylar dahlizidan torib, ulardagi elektr ta’minoti tarmog‘idagi taqsimlash qutisi (elektroshit)lari birma-bir xatlov va nazoratdan o‘tkazilib, aniqlangan kamchiliklar hududiy elektr tarmoqlari korxonasi mutaxassislari hamkorligida joyida bartaraf etilmoqda.

Jumladan, viloyat markazida "Dilshodbek" boshqaruv servis kompaniyasi tomonidan xizmat ko‘rsatilayotgan "Shayx-ul olam" mahalla fuqarolar yig‘inidagi 21-, 22- va 24-sonli ko‘p xonadonli turar joylarning kirish yo‘laklarida o‘rnatilgan elektroshitlarni ham ta’mirlash jarayonida yaroqlilik muddatini o‘tab bo‘lgan elektr anjomlari yangi va energiya tejamkor jihozlarga almashtirildi. 

Buxoro shahridagi "Buxoro Polizol servis" MCHJ boshqaruv kompaniyasi ishchi-xodimlari tomonidan hududdagi ko‘p kvartirali uylarda istiqomat qiluvchi aholi vakillarining talab va takliflari o‘rganilib, uylarga yondosh hududlar obodonlashtirilishi bilan bir qatorda kirish yo‘laklarini ta’mirlash hamda yaroqlilik muddatini o‘tab bo‘lgan yog‘och deraza romlarni zamonaviy va energiya tejamkor “AKFA” romlariga almashtirish ishlari amalga oshirilgan.  

Viloyat hokimligi matbuot xizmati