Buxoro tumani: “Bir kontur - bir mahsulot” tamoyili asosida brokolli karami yetishtirilmoqda
2024-10-09 17:45:00 / Yangiliklar
— "Rabotipoyon"lik Bekzod, Bahodir va Bobir Salomovlar, Doston To‘layev, Oybek Panoyev, Qahramon Sobirov, Iroda Baqoyeva, Feruza Husenova, Akbar Bozorov, shuningdek, Matluba, Nasiba, Fazliddin, Furqat, Foziljon Najmiddinovlarning har biri bugunga kelib 40-50 sotixdan yer maydoniga ega bo‘lib, takroriy ekin yetishtirishni yoz oylaridan boshlab yuborishgan,—deydi “Agrobank”ning tuman filiali boshqaruvchisi Uyg‘un Nurullayev.—Ayni kunda bu ishda buyurtmachi agregator, ya’ni hududdagi lider tadbirkorlardan biri “Choriyeva Nigina Qahramonovna” tomonidan tomorqa egalariga zarur urug‘lik, nihol ko‘chatlari, mineral o‘g‘it yetkazib berilib, agrotexnik parvarish ishlari kuzatib borilmoqda.
Bugun boshlangan sa’y-harakatning moddiy manfaatdorlik jihati shundaki, tomorqachi yoshlar aholini arzon va sifatli oziq-ovqat mahsulotlari bilan uzluksiz ta’minlash va ularni daromadini oshirish maqsadida tashabbus ko‘rsatib, 70 kunlik mehnatdan so‘ng barakali hosil yetishtirish va har gektaridan 100 million so‘mga yetkazib daromad olish imkoniga ega bo‘ladilar.
Bu karam turi eksportbop mahsulot bo‘lib, ichki va tashqi bozorda xaridorgir hisoblanadi. Brokkoli karami turli xil salatlar, suyuq taomlar, garnirlar tayyorlash uchun foydalaniladi. Uni marinadlash, muzlatish va konservalash mumkin. U ancha yengil hazm bo‘lish xususiyatiga ega. Rabotipoyonlik tomorqa egalari bu yerda hademay kech kuzga borib karam mahsulotini yig‘ib, saranjomlab olib, erta bahordan yana yer tayyorlab, sabzi ekishni mo‘ljallashmoqda.
Aholining daromad topishga qaratilgan tadbirkorlik tashabbuslarini moliyaviy qo‘llab-quvvatlash, aholiga agrar tarmoqda o‘z biznesini tashkil etishga ko‘maklashish maqsadida amalga oshirilayotgan bu kabi tadbirlar oziq-ovqat xavfsizligini ta’minlashda ham muhim ahamiyat kasb etadi.
Viloyat hokimligi matbuot xizmati