Buxoro viloyati hokimligi

Respublikamizning barcha hududida bo‘lgani kabi Olot tumanida ham sportning futbol, mini-futbol, voleybol, basketbol, kurash, shaxmat, shashka turlariga qiziqadigan yoshlar soni oshib bormoqda. Buning birinchi omili, davlatimiz rahbarining sportga bo‘lgan e’tibori, sport ishqibozlari uchun yaratib berilayotgan shart-sharoit tufaylidir. 

Keyingi yillarda yosh o‘g‘il-qizlarimiz jahon arenalaridagi musobaqalarda munosib ishtirok etib, yurt bayrog‘ini baland ko‘tarib, g‘oliblik nashidasini surmoqdalar. Bu esa, nafaqat barkamol avlod vakillariga, balki yoshi kattalarga ham g‘ayrat-shijoat baxsh etmoqda.

Olis tumanning "Oq oltin" mahalla fuqarolar yig‘ida ham sportsevar yoshlar intilishlarini inobatga olgan holda zamonaviy tipdagi sport maydonchasi qurib bitkazilgani ko‘plarni mamnun qildi. 

Universal sport maydonchasini foydalanishga topshirish tadbirida tuman hokimi Nargiza Ne’matova boshchiligidagi ma’muriy sektorlar rahbarlari, Yoshlar ishlari agentligi, mahalla faollari va sportchi yoshlar hozir bo‘ldilar. Bunda so‘zga chiqqanlar yurtimizning sportda dovrug‘ taratayotgani zamirida yoshlar ta’lim-tarbiyasiga qaratilayotgan e’tibor, ertamiz egalari kamoloti uchun yaratilayotgan shart-sharoit yotganini ta’kiladilar. Mazkur sport majmuasi ham ana shu fikr dalolati ekani va bundan ham kelgusida mahalla faxri sifatida chempionlar yetishib chiqishi qayd qilindi.      

Tadbirda mazkur sport majmuasi yoshlarning bo‘sh vaqtini mazmunli o‘tkazishga xizmat qilishiga ishonch bildirilib, barkamol avlod vakillarining sportga bo‘lgan qiziqishlari yanada ortishiga sabab bo‘lishi aytib o‘tildi.

Umuman, bugun yangi qiyofaga kirib borayotgan Oq oltin mahallasida yoshlarning bo‘sh vaqtini mazmunli o‘tkazish maqsadida barpo qilingan universal sport maydonida 10 tadan ortiq sport turi bilan shug‘ullanish uchun yetarli shart-sharoit yaratilgan.

Viloyat hokimligi matbuot xizmati