Buxoro viloyati hokimligi

Bugunga kelib Vobkent tumanida jami 43 ta ta’lim muassasasi faoliyat yuritayotgan bo‘lib, shundan, 42 ta umumta’lim maktabi, shuningdek, matematika faniga yo‘naltirilgan davlat ixtisoslashtirilgan umumta’lim maktabi va “Barkamol avlod” bolalar maktabida umumiy hisobda 21 ming 800 nafar o‘quvchi ta’lim-tarbiya olishmoqda. 

Ertamiz egalariga jami 2268 nafarga yaqin o‘qituvchi mutaxassis saboq berishmoqda.  
Ayni paytda tumanda davlat maktabgacha ta’lim tashkiloti soni 36 taga yetkazilgan bo‘lib, shundan nodavlat maktabgacha ta’lim tashkiloti soni 97 tani tashkil etmoqda. Bu sa’y-harakat esa hozirda hududda istiqomat qilayotgan aholining 11 ming 700 dan oshiq 3-7 yosh toifasidagi jajji farzandini erta savodini chiqarish uchun bolalar muassasalariga qamrab olishga qaratilgani bilan ahamiyatli. Olib borilayotgan chora-tadjbir natijasida ulardan 9 ming 200 nafari yoki 78,5 foizi maktabgacha ta’lim tashkilotlariga jalb qilingan bo‘lsa, bu tarmoqdagi ish izchil davom ettirilmoqda.  
Umumta’lim maktablarida kasbiy faoliyatini olib borayotgan o‘qituvchilarga kelsak,  ular toifasiga ko‘ra tahlil qilinganda, 2 ming 268 nafar pedagog xodimdan 450 nafari yoki qariyb 20 foizi oliy toifali, 519 nafari yoki deyarli 23 foizi birinchi toifali mutaxassislardir. 

Muassasalar ta’miri va modernizatsiyasiga kelsak, joriy yilning o‘zida investitsiya dasturi doirasida hududdagi 16-, 17- va 21-sonli umumta’lim maktablarida umumiy qiymati 15 milliard 400 million so‘mlik qurilish-ta’mirlash ishlari amalga oshirildi. Xuddi shunday, markazlashgan mablag‘lar hisobidan “Shirin” MFY da 14-sonli umumta’lim maktabining bo‘sh turgan binosida qariyb 1 milliard so‘m sarmoya  evaziga mukammal ta’mirlash ishlari bajarilib, maktab yangicha zamonaviy qiyofaga keltirildi.

Shu bilan birga, joriy yilning o‘zida  7 milliard 300 million so‘mga teng mahalliy budjet mablag‘i hisobidan tumanda 24 ta ta’lim muassasasida ta’mirlash-tiklash ishlari olib borilib, zarur inventarlar, moddiy-texnik jihozlar bilan ta’minlandi. 
Kelgusidagi marralarni kattaroq olish maqsadida tumanning Xajuvon, Shanba hamda Ko‘lxatib mahallalarida umumiy qiymati 10 milliard 500 million so‘mga teng bo‘lgan 3 ta, har biri 90-100 nafar jajji bolajonni o‘z bag‘riga olish imkoniyatiga ega davlat maktabgacha ta’lim tashkilotini qurilish ishlari boshlandi. Bu loyihalar to‘la-to‘kis amalga oshirilishi tufayli yaqin oylarda 3-7 yoshli jajji o‘g‘il-qizning bog‘chalarga qamrovini 87 foizga yetkazish mumkin bo‘ladi. 

Masalan, birgina “Shohnigor” mahalla fuqarolar yig‘inida bugunga kelib 970 taga yaqin xonadon va ularda jami 4 ming 600 dan ortiq aholi istiqomat qilayotgan bo‘lsa, mahalla bundan uch yil burun “Obod qishloq” davlat dasturiga muvofiq zamonaviy qiyofa kasb etgan. Hudud infratuzilmasini yaxshilash maqsadida o‘sha yili mahalliy budjetdan 12,1 milliard so‘m mablag‘ sarflangan.

 Hudud muhandislik-kommunikatsiya tarmoqlarida ta’mirlash-tiklash ishlari olib borilib, aholi va ular farzandlariga qulay imkoniyat yaratilgan. Jumladan, hududdagi 18-sonli maktabgacha ta’lim tashkiloti 1,6 milliard so‘m mablag‘ evaziga qayta ta’mirdan chiqarilgan bo‘lsa, bugunga kelib 38-sonli umumta’lim maktabi zamonaviy qiyofaga keltirilib, ta’mirlash ishlari nihoyalanib, ertamiz egalariga risoladagidek qulaylik yaratilgan. 

Viloyat hokimligi matbuot xizmati