Mazkur sana munosabati bilan viloyat hokimligida tantanali marosim tashkil etildi. 

Unda viloyatdagi ta’lim tashkilotlari mutasaddilari, ilg‘or professor-o‘qituvchilar, yosh olimlar, xorijdan Buxoroga kelib ta’lim berayotgan  pedagoglar, davlat va jamoat tashkilotlari vakillari hamda ommaviy axborot vositalari xodimlari ishtirok etdi.

Dastlab O‘zbekiston Respublikasining davlat madhiyasi yangradi.  

Tadbirda viloyat hokimi Botir Zaripov so‘zga chiqib, yig‘ilganlarni bayram bilan qutladi. So‘nggi yillarda ta’lim sohasida amalga oshirilayotgan islohotlar, viloyatimiz yoshlarining erishayotgan yutuqlari, respublikada namuna bo‘layotgan o‘qituvchilarning ilg‘or pedagogik va ilmiy tajribalari e’tirof etildi.

Ta’kidlanganidek, bugungi kunda viloyatimizdagi 2 500 dan ortiq ta’lim dargohlarida 35 mingdan ortiq pedagog-xodimlar faoliyat olib bormoqda. Keyingi yillarda butun mamlakatimizda bo‘lgani kabi viloyatimizdagi ta’lim muassasalari moddiy-texnik bazasini mustahkamlash borasida ham keng ko‘lamdagi ishlar amalga oshirildi.

Xususan, joriy yilning o‘zida maktablar uchun 8 ta sport zali, 2 ta oshxona qurildi, 16 ta maktabning laboratoriya xonalari jihozlandi.

Ijtimoiy va ishlab chiqarish infratuzilmasini rivojlantirish dasturi asosida 20 dan ortiq muassasada qurilish-ta’mirlash ishlari olib borildi. “Tashabbusli budjet” loyihalarining aksariyat qismi aynan ta’lim muassasalari infratuzilmasini rivojlantirishga yo‘naltirilmoqda. Ana shunday uzoqni ko‘zlangan islohotlar natijasida Yangi O‘zbekiston vakillari sifatida viloyatimizdagi ko‘pgina o‘quvchi-yoshlar xalqaro fan olimpiadalarida munosib ishtirok etib, medallarni qo‘lga kiritishmoqda. Nufuzli san’at festivallari va tanlovlari, xalqaro sport musobaqalarida g‘olib va sovrindor bo‘lishmoqda.

— Shu o‘rinda yana bir muhim dalilni tilga olib o‘tishni istardim. Joriy yilda Xalqaro va respublika fan olimpiadalarida 30 dan ortiq sovrinli o‘rinlar qo‘lga kiritildi. Ushbu o‘quv yilida o‘tkazilgan test sinovlarida ishtirok etgan bitiruvchilarimiz o‘rtacha 88,2 ball to‘plab, respublikada eng yuqori ko‘rsatkichni, ya’ni 1-o‘rinni qayd etdi. 

Albatta, ustozlarimizning mehnatini birgina ushbu jihatlar bilan belgilab bo‘lmaydi. 

Aslida hayotimizdagi har bir omadli qadam, har bir muvaffaqiyat zamirida ustozlarimizning mashaqqatli mehnati, tinimsiz izlanishlari mujassamdir,-dedi Botir Zaripov.

Tadbirda muallimlarning kasb bayrami oldidan Prezidentimiz Farmoniga asosan davlatimizning yuksak mukofotlari – orden va medallarga sazovor bo‘lgan besh nafar buxorolik ta’lim jonkuyari alohida e’tirof etildi. Mukofotlar o‘z egalariga tantanali tarzda topshirildi. 

Shuningdek,  ta’lim-tarbiya tizimida alohida o‘rnak ko‘rsatgan, ayniqsa, faoliyati davomida yuqori ko‘rsatkichlarga erishayotgan bir guruh ustoz va murabbiylar, yosh pedagoglar “Xalq ta’limi fidoyisi”, “Xalq ta’limi a’lochisi”, “O‘rta maxsus va professional ta’lim a’lochisi”, “Oliy ta’lim a’lochisi” ko‘krak nishonlari bilan taqdirlandi. 

Taqdirlanganlar nomidan so‘zga chiqqanlar davlatimizning ushbu yuksak mukofotlari ularga yanada kuch-g‘ayrat bag‘ishlashini, Yangi O‘zbekistonning taraqqiyoti yo‘lida yangi marralarni egallashga undashini ta’kidlashdi, yuksak e’tibori va g‘amxo‘rligi uchun Prezidentimizga samimiy minnatdorlik bildirishdi. 

Barcha davlat mukofotlariga sazovor bo‘lgan hamyurtlarimizga yuksak e’tirof muborak va bardavom bo‘lsin!

Viloyat hokimligi matbuot xizmati