Yangi tahridagi Qonun mazmun-mohiyati keng tushuntirildi
2024-09-20 19:05:00 / Yangiliklar
Seminarda yangi tahrirdagi Qonun vijdon erkinligi me’yorlarini aniq ko‘rsatib, fuqarolarning xohlagan dinga e’tiqod qilish yoki hech qaysi dinga e’tiqod qilmasligini ta’minlashi, shuningdek, har qanday dinga zo‘ravonlik bilan kiritishni taqiqlashi qayd etildi. So‘zga chiqqanlar tomonidan ta’kidlanganidek, demokratik davlatlar qatorida, qonun ustuvorligi tamoyilidan kelib chiqib, O‘zbekistonda ham dinning siyosatga aralashishi hamda dindan siyosiy maqsadlarda foydalanishga yo‘l qo‘yilmasligi Qonunda aniq ko‘rsatilgan.
Yana bir muhim jihat: diniy tashkilotni tuzish uchun talab etib kelingan mahalla fuqarolar yig‘inlari roziligini olish tartibi bekor qilindi.
Bugungi kunda dunyoning ko‘pgina mintaqalarida notinch vaziyat hukm surayotgani tufayli diniy omildan g‘arazli maqsadlarda foydalanish holatlari kuchayib borayotganini kuzatish mumkin. Shuni inobatga olib, O‘zbekiston hududida buzg‘unchi g‘oyalarning tarqalishiga yo‘l qo‘ymaslik uchun diniy mazmundagi bosma, audio va video mahsulotlarni ekspertizadan o‘tkazish dolzarb bo‘lib qolmoqda.
Qonunda jamiyatda turli yot qarashlarni targ‘ib qilayotgan guruhlarning faoliyati, ular tomonidan tarqatilayotgan buzg‘unchi g‘oyalarning salbiy ta’siridan aholini himoya qilish maqsadida diniy mazmundagi materiallarni dinshunoslik ekspertizasining ijobiy xulosasini olgandan keyin tayyorlash, olib kirish va tarqatish belgilab qo‘yildi.
Bundan tashqari, davlat idoralari tomonidan qonun normalari noxolis talqin qilinishi va turlicha qo‘llanishining oldini olish maqsadida atama va tushunchalarga ta’riflar keltirildi, ular aniq va ravshan tarzda bayon etildi.
Qonundagi prinsipial yangiliklar haqida so‘z borganda, diniy-ma’rifiy sohadagi keng ko‘lamli islohotlarning izchil davomi sifatida, avvalo, har bir insonning vijdon erkinligini ta’minlash uchun qulay shart-sharoitlarni yaratishga, huquqni qo‘llash amaliyotiga aniqliklar kiritishga alohida e’tibor qaratilganini ta’kidlash lozim.
O‘zbekistonda 130 dan ortiq millat 16 xil konfessiyaga amal qiladi. Qonun bilan belgilab qo‘yilgan vijdon erkinligini ta’minlash sohasidagi asosiy ustuvorliklar ana shu konfessiyalar o‘rtasida tinchlik va totuvlikni ta’minlash, dunyoviy davlatchilik tamoyilini kafolatlash, shuningdek aholi ongi va qalbiga yot g‘oyalarning singdirilishiga qarshi ma’rifat yo‘li bilan kurashishni nazarda tutadi.
Qonunda fuqarolarning huquqlarini ro‘yobga chiqarish va jamiyatda tinch-totuvlikni ta’minlashga, fuqarolarning munosib hayot kechirishiga shart-sharoit yaratishga davlatning kafil ekani mustahkamlangan.
Qonun turli dinlarga e’tiqod qiluvchi mamlakatimiz fuqarolari o‘rtasidagi o‘zaro do‘stlik va hamjihatlikka asoslangan munosabatlarni saqlab qolish va yanada mustahkamlash, ularning diniy e’tiqod bilan bog‘liq qadriyatlari, urf-odat va an’analari hurmat qilinishi hamda to‘liq ta’minlanishini kafolatlaydi.
Seminar davomida respublika ishchi guruhi a’zolari tomonidan O‘zbekistonda vijdon erkinligini ta’minlash va fuqarolarning e’tiqodiy ehtiyojlarini to‘la-to‘kis qondirish borasida olib borilgan islohotlarning mazmun-mohiyati va huquqiy asoslari to‘liq va tahliliy tushuntirib berildi.
O‘z navbatida, vijdon erkinligini ta’minlash bugungi kunda yurtimizdagi eng ustuvor vazifalardan biri ekani, yangi tahrirdagi Qonun bu boradagi islohotlarning muhim tayanchi hisoblanishi aytib o‘tildi.
Tadbir yakunida soha vakillari mavzu yuzasidan o‘zaro qizg‘in fikr almashdilar hamda tinglovchilar tomonidan berilgan savollarga mutaxassislar tomonidan atroflicha javoblar berildi.
Viloyat hokimligi matbuot xizmati