G‘ijduvon: Savdo-sanoat palatasi raisining o‘rinbosari “Ulfatbibi” va “Oqrabot” mahallalarida bo‘ldi
2024-09-20 15:55:00 / Yangiliklar
Shu kuni davlatimiz rahbarining "Kambag‘allikni qisqartirish va aholini ijtimoiy himoya qilish sohasidagi qonunchilikka rioya etilishi va uning ijrosi ustidan nazoratni kuchaytirish chora-tadbirlari to‘g‘risida"gi PF-136-sonli Farmoni ham qabul qilingan.
Xususan, bu borada Buxoro viloyatiga O‘zbekiston Savdo-sanoat palatasi raisining o‘rinbosari Halimjon Safarov mas’ul etib tayinlanib, yuqoridagi farmon ijrosi yuzasidan amaliy choralarni ko‘rmoqda.
Kuni kecha Halimjon Safarov G‘ijduvon tumani hokimligi mas’ullari bilan birga “Oqrabot” va “Ulfatbibi” mahalla fuqarolar yig‘inlarida olib borilgan xatlov va o‘rganishlar natijasida ishlab chiqilgan yagona ijtimoiy reyestrga muvofiq amalga oshirilayotgan chora-tadbirlarni ko‘zdan kechirdilar.
— Tuman markazidan 15 kilometr uzoqlikda joylashgan “Ulfatbibi” mahalla fuqarolar yig‘ini Kalonxo‘r, Bo‘ldi, Arablar eli, Pozakenti, Cho‘g‘alon, Katta shayxlar, Sharqiy Sho‘robod, Guliston, Xo‘jamahalla qishloqlaridan tarkib topgan bo‘lib, hozirda bu hududda 1 ming 114 ta xonadon, 1 ming 273 ta oila va jami 5,5 mingdan ortiq aholi istiqomat qilmoqda, — deydi MFY raisi To‘xtamurod Yuldashev. — Keyingi ikki yilda mahalla muhandislik-kommunikatsiya tarmoqlarini yangilash, ijtimoiy soha inshootlaridan ta’mirtalablarini qayta shay qilish, obodonlashtirish, yo‘l, elektr energiyasi, ichimlik suvi, gaz ta’minotidagi nuqson va kamchiliklarni bartaraf etishga e’tibor kuchaytirilib, qator amaliy ishlar qilindi.
Masalan, Arablar eli qishlog‘iga 1 dona transformator o‘rnatilib, 1,5 kilometr masofadagi elektr liniyasi yangilangani tufayli yuzta xonadonning elektr energiyasiga bo‘lgan talabi yaxshilangan. Xuddi shunday, Kalonxo‘r qishlog‘ida mavjud transformator ta’mirdan chiqarilib, eskirib yaroqsiz holga kelgan 30 ta simyog‘och sement-beton ustunga almashtirilgan. Endilikda bu ko‘cha tungi yoritish tarmog‘iga ega. Aynan Bo‘ldi qishlog‘ida borayotgan yo‘l ta’miridan oldin 1 ming 600 metr masofaga vodoprovod quvuri tortilgani tufayli endilikda 128 ta xonadon iste’molga yaroqli “obi hayot”dan bahramand bo‘lmoqda.
Mahallada ijtimoiy muhofazaga olingan aholi vakillaridan “Temir daftar”da bugunga kelib o‘nga yaqin, “Ayollar daftari”dan o‘rin olganlar soni 2022 yilda 157 nafardan 2023 yilda 29 nafargacha qisqartirilgan bo‘lsa, joriy yil shu kunida og‘ir sharoitda bo‘lgan o‘nga yaqin ayol amaliy qo‘llab-quvvatlanmoqda.
Tuman hokimining mahalladagi yordamchisi tavsiyanomasi asosida joriy yil shu kuniga qadar mahalla fuqarolar yig‘inida nochor vaziyatda qolgan oilalarning 30 tadan oshig‘iga 800 million so‘mdan ziyod imtiyozli kredit mablag‘i ajratib berilgan. Bu sarmoya o‘z tadbirkorlik faoliyatini boshlash niyatida bo‘lganlarga asosan savdo-sotiq va xizmat ko‘rsatish, parrandachilik va chorvachilikni rivojlantirish, tikuvchilik yo‘nalishlarida rasmiylashtirilgan. Bundan tashqari, shu yil dastlabki yarmi davrida hududdagi qirqqa yaqin kam ta’minlangan va ehtiyojmand oilaning mehnatga layoqatli vakillariga umumiy qiymati 150 million so‘mga teng bo‘lgan motokultivator, elektr payvandlash va o‘t o‘rish uskunalari, tikuv mashinasi va suvni qadoqlash dastgohi yetkazib berilgani ular bandligini ta’minlamoqda.
Xuddi shunday, uyma-uy yurib, o‘rganishlar Oqrabot mahallasida ham davom etdi. Bu mahalalarda alohida toifalangan ehtiyojmand oilalar turmush tarzi, ular tashvish-muammolariga e’tibor qaratilib, tegishlicha tezkor hal qilish choralari ko‘rildi.
Ishchi guruhining "Oqrabot" MFYda yashovchi Sh.Tosheva oilasidagi ijtimoiy ahvol o‘rganilganida, uning ishsizligi va daromadsiz ekani ma’lum bo‘ldi. Savdo-sanoat palatasi raisining o‘rinbosari tomonidan bu xonadon bekasiga hududdagi "Oltin Baraka" MCHJga ishga joylashtirish taklifi bildirildi.
Umuman, aholini har tomonlama qo‘llab-quvvatlash, qiyin vaziyatda daromadsiz qolgan oilalarga ko‘mak berish, ularni ishbilarmonlikka jalb qilish orqali kambag‘allikni qisqartirish borasidagi ishlar tumanning boshqa mahallalarda ham davom ettirilmoqda.
Viloyat hokimligi matbuot xizmati