Buxoro viloyati hokimligi

Tadbirda bugungi kunda davlatimiz va hukumatimiz tomonidan tibbiyot sohasiga qaratilayotgan e’tibor, tarmoqdagi islohotlar va yangi oilaviy poliklinikalar tashkil qilish va unga tor soha mutaxassislari tarkibini muvofiqlashtirish xususida so‘z bordi.

Qayd etilganidek, tibbiyot sohasini rivojlantirish, avvalo, quyi tizimdan boshlanmas ekan, aholi orasida salomatlikni saqlash, tibbiy xizmat sifatini zamon talablari asosida takomillashtirish borasidagi sa’y-harakat kutilgan natijani bermasligi kunday ravshan. Shu ma’noda hatto, olis qishloq joylarida ham to‘g‘ri tashxis qo‘yish va davolash imkoniyatiga, salohiyatli kadrlarga ega tibbiyot maskanlari bo‘lmog‘i hayotiy zaruratdir.

"Qarovul" hamda “Xumdonak” mahalla fuqarolar yig‘inlarida joylashgan “Mahmud Torobiy” oilaviy shifokorlik punkti hamda 20-son oilaviy poliklinikasi ayni kunda hududdagi 9 mingdan oshiq aholiga tibbiy xizmat ko‘rsatish imkoniga ega. Birgina “Mahmud Torobiy” OSHPni olsak, bu inshoot 22 ta xonadan iborat bo‘lib, labaratoriya, emlash, stomatologiya, akusher-ginekolog, qaydxona, patronaj hamshiralari hamda umumiy amaliyot shifokori va boshqa xonalaridan tashkil topgan. 

Har ikki tibbiyot maskani UZD, labaratoriya, emlash, EKG, fizioterapiya, stomatologiya, akusher-ginekolog, kunduzgi shifoxona, qaydxona, patronaj xamshira, umumiy amaliyot shifokorlari va boshka tor soha xonalaridan tashkil topgan. Qisqa aytganda, bu binolar xalqaro standartlarga to‘la mos keladigan va zamonaviy axborot-kommunikatsiya texnologiyalari va tibbiyot jihozlari bilan ta’minlangan bo‘lib, keng xonalar, aholi qabuli uchun qulay xonalariga ega. Bunda ichki dorixona faoliyati ham yo‘lga qo‘yilgan.

Shinam barpo qilingan inshootlarni foydalanishga topshirish marosimida ramziy lentalar qirqilib, yig‘ilganlar unda yaratilgan shart-sharoit va qulayliklar bilan yaqindan tanishdilar.

Viloyat hokimligi matbuot xizmati