Olot: Roʻziyevlar oilasi mehnatkashlari issiqxonasidan 120 million soʻm daromad olmoqda
2026-01-09 20:00:00 / Yangiliklar
Ilhom Roʻziyev oʻz tomorqasining 8 sotix qismida barpo etilgan issiqxonada yil davomida turli qishloq xoʻjaligi mahsulotlarini yetishtirib, moʻl hosil olayotir. U erta bahordan kartoshka, pomidor, piyoz, bodring, bulgʻor qalampiri, baqlajon kabi sabzavotlar bilan bir qatorda limon, apelsin va mandarin kabi sitrus mevalarni ham parvarishlab kelmoqda.
— Tomorqa mehnati bizga yoshligimizdan, ota-onamizning tarbiyasi bilan singgan, desak mubolagʻa emas. Yerga mehr bersang, u albatta moʻl hosil, qut-barakasini qaytaradi,—deydi Ilhom Roʻziyev.—Mahallamizda koʻpchilik issiqxona bilan shugʻullanayotgani bizni ham toʻxtab qolmasdan, qishda ham mehnat qilib, sara mahsulot yetishtirishga undaydi.
Bugunga kelib issiqxonada 70 tup limon va 30 tup mandarin va apelsin butasi parvarishlanmoqda. Shuningdek, issiqxonani 4 sotix qismida pomidorning “Agra” naviga mansub 1200 tup koʻchat ekilgan boʻlib, shu kunlarda qizarib pishmoqda, hademay, 3 tonnaga yaqin pomidor hosilini saranjomlab olish koʻzda tutilgan.
Sitrus mevalardan esa hozirgacha 1 tonnadan ortiq hosil olinib, bozor rastalariga yetkazilgan. Oʻrtacha 25 ming soʻmdan sotilgan bu mahsulot evaziga 25 million soʻmdan ortiq daromad qoʻlga kiritilgan. Bundan tashqari, issiqxona maydonidan unumli foydalanib, qator orasida oila dasturxoni uchun zarur sarxil koʻkatlar yetishtirilayotgani ham eʼtiborga loyiq.
— Oʻtgan yili tomorqamizdan 100 million soʻmga yetkazib foyda oldik. Mehnatimiz samarasi—daromadni roʻzgʻorimizni butlashga, orzu-havasimizga sarflayapmiz,— deydi “Namunali tomorqachi” koʻkrak nishoni sohibi Ilhom Roʻziyev.— Tomorqa va undagi issiqxona biz uchun nafaqat daromad, balki kundalik turmushimiz mazmuniga aylangan.
Ekishdan avval yerni puxta tayyorlash, mahalliy oʻgʻitlardan foydalanish, urugʻni sinchiklab tanlashga alohida eʼtibor beriladi. Sitrus butalari oraligʻida esa kartoshka yetishtirilib, yer maydonidan maqsadli foydalanilmoqda. Ilhom Roʻziyevning tajribasi shuni koʻrsatadiki, tomorqadan oqilona foydalanish, mehnat va sabr-toqat insonni farovon hayot sari yetaklaydi.
Viloyat hokimligi matbuot xizmati