Buxoro viloyati hokimligi

Shu bois, Shofirkon tumanida ham bu yilgi mavsumda 820 gektar maydonda sabzavot-poliz mahsulotlari ekib yetishtirildi.  Ayni kunda Tezguzar, Iskogare, Mazlaxon Chandir, Denov, Joʻyrabod, Sharof Hamroyev kabi hududlarning har birida 20-24 gektar yerda sabzavot mahsulotlari ekib, moʻl hosil olish tajribasi shakllangan. 

Birgina “Doʻrman” hududini olsak, yakunlanayotgan yil dehqonchilik mavsumida 128,4 gektar mevazor bogʻ va qariyb 8 gektar tokzorni oʻz tasarrufiga olgan manzilda 22 ta fermer xoʻjaligi tomonidan har gektar hisobiga 200 sentner atrofida, aniqrogʻi, 2 ming tonnadan ortiq meva, 200 tonna atrofida uzum yetishtirilgan.

Mazkur fermerlar qoʻli ostidagi 200 kishidan ortiq ishchi va qirqdan ziyod oiladan tashkil topgan jamoalar tomonidan aholi dasturxoniga xushxoʻr olma, behi, nok, oʻrik, shaftoli, olxoʻri va gilos kabi xushxoʻr meva mahsuloti yetkazib berilgan boʻlsa, fermerlar tomonidan yana deyarli 8 gektarga yaqin maydonda intensiv usulda olma, shaftoli va olxoʻrizor tashkil etish harakati bormoqda. Har bir fermer oʻz jamoasi bilan mavjud bogʻ va tokzorlari qator oralarini toʻldirish, dala chetlarini obodonlashtirish va koʻkalamzorlashtirish maqsadida 400 tupdan mevali va 600 tupdan tok koʻchatlarini oʻtqazishib, nihollarni parvarishlamoqdalar.   
 
Aynan “Doʻrmon” mahalla fuqarolar yigʻinidagi “Feruz” fermer xoʻjaligida qishloq xoʻjaligining zamonaviy va samarali agrotexnologiyalari asosida kuz oylaridan sabzi yetishtirish ishlari izchil olib borilmoqda. Xususan, fermer xoʻjaligiga qarashli 1,6 gektar yer maydonida plyonka ostida serhosil sabzi urugʻi ekilib, parvarish ishlari agrotexnik talablar asosida olib borilmoqda. 

Mazkur texnologiya sabzavotchilikda hosildorlikni oshirish, suv va boshqa resurslardan tejamkor foydalanish, mahsulotni bozorga ertaroq yetkazib berish imkonini yaratmoqda. Bu tinib-tinchimaslik tufayli hademay, aniqrogʻi bahor oylariga borib bu yerdan jami 60 tonna atrofida sabzi hosili olish koʻzda tutilgan. Bozor konyunkturasidan kelib chiqib, sabzining 1 kilogrammi 10 ming soʻmdan 15 ming soʻmgacha narxlarda baholanmoqda. Bundan koʻrinadiki, fermer xoʻjaligi 60 tonna hosildan kamida 600 million soʻm moddiy manfaatdorlikni koʻzlamoqda. Boshqacha aytganda, “Feruz” fermer xoʻjaligi tajribasi hududdagi boshqa fermerlar uchun ham amaliy namunadir. 

Viloyat hokimligi matbuot xizmati