Buxoro viloyati hokimligi

Shu kunlarda olis hududda qishloq xoʻjaligiga ixtisoslashgan 200 dan ortiq fermer xoʻjaligi va ular tasarrufidagi ekin yerida qishki mavsum kechiktirib boʻlmas agrotexnik tadbirlariga eʼtibor kuchaytirilgan. Bu jarayon ayniqsa, buyurtmachi va qayta ishlovchi “Parvoz Xumo Ravnaq trans” va “Merganteks” masʼuliyati cheklangan jamiyati shaklidagi paxta-toʻqimachilik klasterlari bilan hamkorlikda 7 ming 600 gektardan oshiq yerda jadal tashkillashtirilgan. 

Mahalliy  dehqon mirishkorlar joriy yil hosili uchun yer tayyorlash, kech kuzdan boshlab har bir konturni belgilangan talab darajasida chuqur haydab, har gektar hisobida 4-5 tonnadan mahalliy oʻgʻit kiritib, ekin maydonlari “shoʻrini yuvish” agrotexnik tadbirlariga jadal kirishganlar.

"Denov" hududidagi "Olot cotton klaster" MCHJ tasarrufidagi dalalarda shoʻr yuvish tadbirlariga bagʻishlangan amaliy seminar tashkil etildi. Seminarda tuman hokimligi, qishloq xoʻjaligi sektori masʼullari, fermerlar hamda mutaxassislar ishtirok etdilar. Koʻrgazmali tadbirda qatnashgan qishloq xoʻjaligi masʼullari, taʼminotchi va fermerlarga zarur tavsiya va topshiriqlar berildi. 

Ayniqsa, suv taqchilligi yil sayin oshib borayotgan sharoitda ekin yerlari “shoʻrini yuvish” tadbirlariga alohida eʼtibor qaratish, fermer xoʻjaliklariga ajratilayotgan suv miqdori—limit hisobiga bu tadbirni sifatli oʻtkazishning barcha choralarini koʻrish zarurligi taʼkidlandi.

Shudgor qilingan dalalarni bostirib sugʻorishdan oldin lazerli uskuna yordamida tekislash, suvdan maqsadli va oqilona foydalanish, ekin maydoni oʻlchamlari va chilla suviga qondirish tartibi haqida batafsil maʼlumot va tahlillar keltirildi. Taʼkidlanganidek, “shoʻr yuvish” ishlarini belgilangan muddat va meʼyorlar asosida amalga oshirish kelgusida yuqori hosil olishning eng muhim omillaridan biridir.

Shuningdek, soʻnggi yillarda olis hududda 140 kilometrdan ziyod xoʻjaliklararo oʻtgan ariq oʻzani betonlashtirilgani bu boradagi ishlarni yengillashtirmoqda. Hozirda ariq va kanallarda taʼmirlash va betonlashtirish ishlari manzilli davom ettirilmoqda. Bu esa suv yoʻqotishining oldini olib, olis dalalargacha suvning bir maromda yetib borishini taʼminlab, “shoʻr yuvish” ishlari samaradorligini oshirishga xizmat qilmoqda. 

Baʼzi maʼlumotlarga nazar solsak, ayni kunda tumanda 2 ming gektar maydonda “shoʻr yuvish” ishlari bajarilgan. Umuman, joriy mavsumda fermer xoʻjaliklari, aholi tomorqa yerlari va dehqon xoʻjaliklari ekin maydoni bilan qoʻshganda, jami 15 ming gektar yer maydonida “shoʻr yuvish” agrotexnik tadbirlari amalga oshirilmoqda. Asosiysi, “shoʻr yuvish” tadbirlarining pirovard natijasi  yer unumdorligini tiklash va sifatli, barakali hosil yetishtirishdan iborat.

Viloyat hokimligi matbuot xizmati