Kogon shahri: Mahmud Tarobiy va Qorovulbozor shoh koʻchalari kesishmasida yana bir shaxobcha ishga tushdi
2025-12-30 17:20:00 / Yangiliklar
Kogon shahridagi sobiq yoʻl harakati xavfsizligi boʻlimi maʼmuriy idorasining yer maydoni auksion ochiq savdoga chiqarilib, uni “Ilgʻor pahlavon savdo” xususiy korxonasi yutib olgandi. Mazkur yer maydoyi 20 sotixdan iborat boʻlib, bunda biznes loyiha sifatida 1,2 million AQSH dollari evaziga avtomobillarga yoqilgʻi quyish va elektr bilan quvvatlash shaxobchasini tashkil etish loyihasi ilgari surilgan.
Bu tashabbus va amaliy ishlar Kogon shahridagi Mahmud Tarobiy hamda Qorovulbozor shoh koʻchalari kesishmasida amalga oshirilib, har tomonlama haydovchilarga ham qulay hisoblanadi. Shaxobchaning ishga tushirilishi natijasida 10 nafarga yaqin fuqaroning bandligi taʼminlanmoqda.
Xizmat koʻrsatish obyektining foydalanishga topshirish marosimida Kogon shahar hokimligi, boshqa mutasaddilar ishtirok etishdi.
Avtomobillarga gaz quyish va elektr toki bilan quvvatlash xizmati joriy qilingan stansiya egasi, tadbirkor Siroj Turdiyevning taʼkidlashicha, shaxobcha ishini barqaror tashkil etish bilan birga, 2026-yilda 3 million AQSH dollariga teng sarmoya hisobidan yana bir avtomobillarga yoqilgʻi quyish shaxobchasini qurib ishga tushirish, oʻttizdan oshiq ishchi bandligini taʼminlash maqsad qilingan.
Viloyat hokimligi matbuot xizmati