Olot: “Tashabbusli budjet” loyihasi doirasida OIV — tumanlararo tibbiy laboratoriyasi ish boshladi
2025-12-29 15:35:00 / Yangiliklar
Ayni kunda dunyo miqyosida sogʻliqni saqlash tizimi oldida turgan dolzarb vazifalardan biri orttirilgan immunitet tanqisligi virusi (OIV) infeksiyasining oldini olish va uni erta aniqlashdan iboratdir. Jahon sogʻliqni saqlash tashkiloti maʼlumotlariga koʻra, hozirda dunyo boʻyicha qariyb 40 million kishi ushbu infeksiya bilan yashamoqda. Har yili kasallikka chalinayotganlar sonining oʻrtacha 1,5 million nafarga ortib borayotgani muammoning naqadar hayot-mamot masalasi ekanini koʻrsatadi.
Aholi salomatligini muhofaza qilish va xavfli kasalliklarning oldini olish borasida Olot tumanida ham muhim amaliy qadam qoʻyildi. Xususan, “Tashabbusli budjet” loyihasi doirasida tumanda talab darajasidagi Orttirilgan immunitet tanqisligi sindromi tibbiy laboratoriyasi barpo etilib, foydalanishga topshirildi. Mazkur loyiha jamoatchilik tomonidan faol qoʻllab-quvvatlanib, tanlovda gʻolib deb topildi hamda uni amalga oshirish uchun 1 milliard 500 million soʻm mablagʻ yoʻnaltirildi.
Respublika Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasi Buxoro viloyati “OITS” ga qarshi kurashish markazining Olot tumanlararo “OIV” diagnostika laboratoriyasi binosi tuman markazida, tibbiyot birlashmasida barpo qilingan boʻlib, olotliklar bilan bir qatorda, qoʻshni hududlar aholisi va mehmonlarga ham sifatli tibbiy xizmat koʻrsatish imkonini beradi. Bu tibbiyot maskani viloyatda oʻz yoʻnalishi boʻyicha dastlabkilaridan biri hisoblanib, zamonaviy tibbiy asbob-uskunalar va laboratoriya jihozlari bilan toʻliq taʼminlangan.
Yangi yil bayrami arafasida tibbiy laboratoriyani foydalanishga topshirilishi munosabati bilan tuman hokimligi, Sanitariya-epidemiologik osoyishtalik va jamoat salomatligi xizmati, tuman tibbiyot birlashmasi mutasaddilari hozir boʻldilar. Soʻzga chiqqanlar ushbu loyiha aholi salomatligini mustahkamlash, OIV infeksiyasini erta aniqlash hamda kasallik tarqalishining oldini olishda muhim ahamiyat kasb etishini taʼkidladilar. Zamonaviy laboratoriya faoliyati OIV infeksiyasini erta bosqichda aniqlash, bemorlarni oʻz vaqtida tibbiy nazoratga olish hamda kasallikning keng tarqalishining oldini olishda muhim oʻrin tutadi.
Shuningdek, “Tashabbusli byudjet” loyihasi doirasida pudratchi “Gidro Civil Engineering” MCHJ tomonidan amalga oshirilgan ishlar, bunda tibbiyot birlashmasi jamoasining ovoz berishdagi hamjihatligi qayd etildi. Loyihada ikki karra gʻoliblik natijasida ajratilgan 1 milliard 500 million soʻm mablagʻ tibbiyot birlashmasi binosining fasad qismini mukammal rekonstruksiya qilish va ichki yoʻllarni kapital taʼmirlashga yoʻnaltirildi.
Olis tumanda tibbiyot tizimining moddiy-texnik bazasini mustahkamlash maqsadida viloyat va tuman hokimligi amaliy koʻmagida umumiy qiymati 2 milliard 200 million soʻmga teng zamonaviy tibbiy asbob-uskunalar shifoxonaga olib kelinmoqda. Bu esa shifokorlar faoliyatini yengillashtirib, aholiga koʻrsatilayotgan tibbiy xizmatlar sifati va samaradorligini yanada oshirishga xizmat qiladi.
Viloyat hokimligi matbuot xizmati