Shofirkon: yuqori texnologik boʻyrak operatsiyasi muvaffaqiyatli bajarildi
2025-12-26 08:55:00 / Yangiliklar
Malakali mutaxassislar konsiliumidan soʻng bemorda yuqori texnologik jarrohlik amaliyoti, yaʼni, oʻng boʻyrak yuqori qutbi kistasini laparoskopik usulda olib tashlash jarrohlik amaliyoti muvaffaqiyatli bajarildi. Ahamiyatli jihati, mazkur turdagi murakkab tibbiy operatsiyalar yaqin-yaqingacha asosan ryespublika Urologiya markazi va uning filiallarida amalga oshirilgan boʻlsa, endilikda viloyatimiz chekka hududlarida, jumladan, Shofirkon tumani tibbiyot birlashmasida ham yoʻlga qoʻyildi.
Oldin bu turdagi tibbiy operatsiyalar katta kesmalar orqali bajarilgan boʻlsa, hozirda zamonaviy kam invaziv (laparoskopik) usul qoʻllanilmoqda. Mazkur usulning ustunligi shundaki, bemorning sogʻayish jarayoni ancha tez kechadi, ogʻriq sindromi kam boʻladi hamda jarrohlik amaliyotidan keyin 3 kun ichida bemor salomatligi ancha tiklanib, uyiga kuzatib qoʻyiladi va qisqa muddatda mehnat faoliyatini tiklash imkoniga ega boʻladi.
Chekka tumanda yuqori texnologik jarrohlik amaliyoti muvaffaqiyatli bajarilganida mahalliy vrach mutaxassislardan Behzod Rofiyevning shu mutaxassislik boʻyicha xorijda, Turkiyaning Anqara shahridagi nufuzli klinikalarda malaka oshirib qaytgani juda qoʻl keldi. Ayni paytda u malakali urolog-jarroh sifatida bemorlar salomatligini tiklashda oʻz bilim va kasb mahoratini ayamasdan mehnat qilmoqda. Muhimi, chekka tumanda tibbiyot sohasida amalga oshirilayotgan bunday yutuqlar aholiga yuqori sifatli, zamonaviy tibbiy yordam koʻrsatish imkoniyatlarini yanada kengaytirmoqda.
Viloyat hokimligi matbuot xizmati