Buxoro shahri: "Shayxul olam" mahallasida aholi bandligi taʼminlanmoqda
2025-12-25 23:35:00 / Yangiliklar
Ayni kunda bu mahallada 1387 ta xonadon, 1182 ta oila va ularda jami 4 mingdan ortiq aholi vakili umrguzaronlik qilmoqda. Mahallaning asosiy rivojlanish “drayveri”, yaʼni tirikchilik manbai savdo, ishlab chiqarish va hunarmandchilik yoʻnalishlari hisoblanadi.
Mahallada istiqomat qiluvchi Dildora Jumayeva ham aynan shu sohada faoliyat yuritib kelayotgan hunarmand, ham tadbirkor ayollardan biri. U milliy liboslar, ayollar kiyimlari, kundalik turmushda zarur boʻladigan buyumlar, ayniqsa, toʻy-marosimlari uchun moʻljallangan koʻrpacha, yostiq, koʻrpalar tikib tayyorlash bilan shugʻullanadi. Dildora Jumayeva hozirda 5 nafar shogirdiga sabr-toqat, matonat bilan hunar sirlarini oʻrgatib kelmoqda. Ular birgalikda buyurtmalarni sifatli, bejirim tikib, egalariga yetkazishmoqda.
Ustoz–shogird anʼanasini muvaffaqiyatli yoʻlga qoʻygan ushbu hunarmand ayolga davlat tomonidan 5 million soʻm subsidiya ajratilgan. Hunarning sir-asrorini puxta oʻrganib, amaliyotda qoʻllayotgan shogirdlariga u oyiga 3 million soʻm atrofida ish haqi toʻlab kelmoqda. Tadbirkorning bir oylik sof foydasi 8 million soʻmdan oshadi. Bu esa kuchli sabr, tinimsiz mehnat va izlanish samarasidir.
Mahalladagi tadbirkorlik faqatgina xotin-qizlar faoliyati bilan cheklanib qolmagan. Bu yerda muntazam ravishda yangi ish oʻrni yaratilib, aholi bandligi taʼminlanmoqda. Jumladan, mahallada istiqomat qiluvchi Ravshan Ashurov ham oʻz faoliyati bilan farovonlik sari hissa qoʻshmoqda. U oʻziga tegishli joyda sartaroshlik faoliyatini yoʻlga qoʻygan. Tadbirkor tashabbusi davlat tomonidan qoʻllab-quvvatlanib, unga mahalladagi hokim yordamchisi tavsiyanomasi asosida 17 million soʻm imtiyozli kredit mablagʻi ajratilgan. Bu sarmoya evaziga zarur jihozlar xarid qilinib, faoliyat muvaffaqiyatli yoʻlga qoʻyilgan.
Bugunga kelib sartaroshxona aholiga sifatli xizmat koʻrsatmoqda. Muhimi, bu yerda ikki nafar fuqaro doimiy ish bilan taʼminlangan. Mijozlar ishonchini qozongan tadbirkorning bir oylik sof foydasi 6 million soʻmdan kam emas. Yosh shrgirdlarga esa 2 million soʻmdan oshiq ish haqi toʻlab kelinmoqda.
Xulosa shuki, viloyat markazidagi aholi gavjum maskanlardan biri boʻlgan hududda aholiga maishiy xizmat koʻrsatish tarmogʻi, tadbirkorlik tashabbuslari rivojlanmoqda.
Viloyat hokimligi matbuot xizmati