Buxoro tumanida 22 nafar bolajonning sunnat toʻyi nishonlandi
2025-12-25 21:05:00 / Yangiliklar
Ehtiyojmand, boquvchisini yoʻqotgan oilalarni qoʻllab-quvvatlash, mehr-oqibat va saxovat tuygʻularini yanada mustahkamlash maqsadida ayni yangi yil bayrami oldidan mahalla va qishloqlarda xayriya tadbirlari, sunnat toʻylari oʻtkazilmoqda. Ana shunday ezgu tashabbuslardan biri kuni kecha Buxoro tumanidagi “Istav Fayz” toʻyxonasida tashkil qilindi.
Tuman hokimligi va saxovatpesha tadbirkorlar koʻmagida hududda boquvchisini yoʻqotgan, ijtimoiy himoyaga muhtoj va kam taʼminlangan oilalarning 22 nafar farzandining sunnat toʻy zoʻr tantana qilindi.
Tadbirda soʻzga chiqqanlar barchani yaqinlashib kelayotgan yangi yil bayrami bilan muborakbod etishib, sunnat toʻyi nishonlanayotgan bolalarning ota-onalarini quvonchli sana bilan qutladilar. Tantanada ertamiz egalari, bolajonlar kelajagiga katta ishonch bildirildi.
Shu kuni bolajonlar va ular ota-onalari quvonchi-kulgusiga, fayzga burkangan toʻyxonada sunnat toʻyi oʻtkazilayotgan oʻgʻlonlarga esdalik sovgʻalari, velosipedlar va turli oʻyinchoqlar topshirildi.
Tadbirning badiiy qismida tuman madaniyat boʻlimi sozanda va xonandalari tomonidan tayyorlangan teatrlashtirilgan tomoshalar, qoʻshiq va kuylar mehmonlarga bayramona kayfiyat va koʻtarinki ruh bagʻishladi. Mazkur saxovat tadbiri mehr-oqibat, insonparvarlik va hamjihatlik kabi qadriyatlarimizning yana bir yorqin namunasidir.
Viloyat hokimligi matbuot xizmati