Shofirkon: “Churuq” ovulida yashovchi aholi salomatligi doimiy eʼtiborda
2025-12-24 15:50:00 / Yangiliklar
Churuq aholi punkti Shofirkon tumani markazidan 110 kilometr uzoqlikda joylashgan boʻlib, infratuzilma va ijtimoiy xizmatlarni tashkil etish alohida eʼtibor talab etadi. Aholi punkti aholisi jami 154 nafarni tashkil etadi.
Shundan 7 yoshgacha boʻlgan bolalar soni 17 nafarni, 15 yoshgacha boʻlgan oʻsmir oʻgʻil-qiz 42 nafarni tashkil etadi. Hududda 14 nafar keksa yoshdagi fuqaro istiqomat qiladi. Shuningdek, hududda fertil yoshdagi ayollar soni 24 nafar boʻlib, bu koʻrsatkichlar hududda ona va bola salomatligini muhofaza qilishga alohida eʼtiborni taqozo etadi, albatta.
Churuqliklar oʻrtasida olib borilgan tibbiy tahlillarga koʻra, surunkali kasalliklar aniqlangan. Jumladan, gipertonik kasallik, qandli diabet, yurak-qon tomir kasalliklari bilan ogʻriganlar jami oʻndan oshiq. Bu kasalliklar doimiy tibbiy nazorat va profilaktik chora-tadbirlarni taqozo etmoqda.
Churuq aholi punktida aholiga tibbiy xizmat koʻrsatish maqsadida tibbiyot punkti tashkil etilgan boʻlib, choʻlquvarlarga birlamchi tibbiy-sanitariya yordami koʻrsatilmoqda. Shuningdek, hududga 1 dona tez tibbiy yordam avtomashinasi va hamshiralar biriktirilgan boʻlib, bu shoshilinch holatda bemorlarni tuman markaziy shifoxonasiga tezkor yetkazish imkonini beradi.
Aholi oʻrtasida emlash ishlari ham mahalla tibbiyot punktida amalga oshirilmoqda. Churuq aholisiga tuman tibbiyot birlashmasining 46-sonli oilaviy poliklinikasi tibbiyot xodimlari tomonidan birlamchi tibbiy xizmat koʻrsatilmoqda. Ayni paytda har oyda tuman koʻp tarmoqli markaziy poliklinikasi hamda tuman tibbiyot birlashmasi bosh mutaxassislari tomonidan rejali tibbiy koʻriklar oʻtkazib kelinmoqda. Jarayonda aniqlangan kasalliklar boʻyicha bemorlar ambulator va statsionar sharoitda davolanmoqda.
Shu bilan birga, har oy aholi chuqurlashtirilgan tibbiy koʻrikdan oʻtkazilib, aniqlangan kasalliklar boʻyicha 29 turdagi bepul dori-darmon vositalari va bogʻlov materiallari ehtiyojga qarab yetkazib berilmoqda. Bu esa aholi salomatligini saqlash va kasalliklarning asoratlarini oldini olishda muhim ahamiyat kasb etmoqda.
Umuman, tizimli yondashuv orqali Churuq aholisining sogʻligʻini mustahkamlash, tibbiy xizmat sifatini oshirish va chekka hududda yashovchilarning ijtimoiy himoyasini kuchaytirishga erishilmoqda.
Viloyat hokimligi matbuot xizmati