Kogon: “Bir kontur — bir mahsulot” tamoyili asosida yana 34 ta xonadonga issiqxona qurib berilmoqda
2025-12-24 12:00:00 / Yangiliklar
Mazkur issiqxonalarning aksariyati 1–4 sotixdan iborat boʻlib, yil boʻyi asosan pomidor, kartoshka, piyoz, bodring, karam, sarimsoqpiyoz, qolaversa, limon, apelsin kabi sitrus meva yetishtirilib, xalqimiz dasturxoniga tuhfa etib kelinmoqda.
Shu oʻrinda chogʻroq yeridan katta daromad olayotgan kogonlik ilgʻor tomorqa egalaridan Sorgʻun mahallasida yashovchi Shuhrat Toʻrayev, Oʻba-Choʻli mahallasida yashovchi Nosir Haydarov, Bahouddin Naqshband mahallasida yashovchi Bahrom Yodgorov, Sarayon mahallasida yashovchi Said Narziyev, Tutkunda mahallasida istiqomat qilayotgan Axtam Fozilovlarni alohida koʻrsatish mumkin. Yil boʻyi astoydil ekin yerida ishlab, kerak boʻlsa “yoʻqni yoʻndirib”, pirovardida peshona teri evaziga barakali hosil yetishtirayotgan aholi xonadonlari mirishkorlari bular. Mazkur xoʻjaliklarda joriy yil qish oylaridan plyonka ostida kartoshka, pomidor, piyoz, bulgʻor qalampiri, yana boshqa mahsulotlar yetishtirilayotganini koʻrish mumkin. Ular orasida limon yetishtirishda puxta tajribaga egalari bor.
Tumanda aholi tomorqalaridan samarali foydalanishni yoʻlga qoʻyish borasida tizimli ishlar amalga oshirilmoqda. Shu kunlarda “Kogon” mahalla fuqarolar yigʻinida ishsiz, kam daromadli oilalar aʼzolaridan iborat 34 nafar fuqaro “Bir kontur — bir mahsulot” tamoyili asosida imtiyozli kredit mablagʻi bilan taʼminlanib, ular har biriga 5 sotixdan issiqxona qurib berilmoqda.
Barpo etilayotgan issiqxonalarda bozorbop va talab yuqori boʻlgan qishloq xoʻjaligi sabzavot-poliz mahsulotlari, koʻkatlar yetishtirib daromad topish maqsad qilingan. Bu bilan nafaqat ichki bozorga mahsulot chiqariladi, balki aholiga doimiy daromad manbai yaratiladi. Hududda yangi ish oʻrinlari yaratish, aholi ijtimoiy barqarorligini taʼminlashda ham issiqxona muhim bir vositadir.
Viloyat hokimligi matbuot xizmati