Buxoro tumani: “Zarmanoq”da Sodiq Odinayev ham qoʻziqorin yetishtirib, yaxshi foyda koʻrmoqda
2025-12-23 13:15:00 / Yangiliklar
Qorongʻi va salqin xonada yetishtirilayotgan, polietilen qopchalarni yorib chiqib boʻy koʻrsatayotgan qoʻziqorindan bir yil davomida oʻrtacha 4–5-marta hosil olish, mehnatga yarasha foyda koʻrish imkoniyati bor. Atigi 0,5 sotix yerda boshlangan “vishenka” naviga mansub qoʻziqorin yetishtirishdan taxminiy hisob-kitobga koʻra, 15 million soʻmga yaqin daromad olish mumkinligi allaqachon tajribada sinovdan oʻtgan.
Buxoro tumani, “Zarmanoq” mahalla fuqarolar yigʻinida yashovchi Sodiq Odinayev ham ayni kunda xonadoni atrofidagi boʻsh joydan unumli foydalanish maqsadida qoʻziqorin “biznesi”ni boshlagan. Albatta, bu ish oila moddiy ehtiyojlarini qoplashda ham foydali, daromadbop.
“Vishenka” serhosil naviga mansub qoʻziqorini yetishtirishda katta maydon talab qilmaydi, qisqa muddatda hosil beradi va bozor talabiga mos keladi. Mehnatsevar tadbirkor qoʻziqorinlarni yetishtirish jarayonida belgilangan agrotexnik qoidalarga qatʼiy amal qiladi. Yetishtirilgan mahsulot sifatli boʻlib, mahalliy bozorda xaridorgirligi bilan ajralib turadi.
— Qoʻziqorin yetishtirish unchalik murakkab jarayon emas, — deydi Sodiq Odinayev. — Chigit qipigʻi, yaʼni sheluxa bilan toʻldirilgan polietilen qopchalarga ekilgan urugʻ 40 kun ichida hosilga kirib, tayyor boʻladi va chiqarib sotish mumkin. Shu bois, bu oʻziga xos ishda barqaror hosil va daromad mavjud. Hozirda xoʻjaligimizda qoʻziqorinning “vishenka” turidan 2 sotixdan iborat yerda yetishtirib, 3-4 tonnagacha hosil olishni koʻzlaganmiz.
Mutaxassislar fikricha, oʻzida gelvelat kislotasi mavjud zamburugʻlar, jumladan, “Veshanka” va “Shampinyon” naviga mansub qoʻziqorinni oldin suvda qaynatib, soʻng bemalol turli taomlar tayyorlab isteʼmol qilish mumkin. Madaniy sharoitda yetishtirilgan qoʻziqorinlar sanitariya-epidemologiya xizmati laboratoriyalarida tekshiruvdan oʻtkazilib, zararsiz deb topilgandan keyingina sotuvga chiqariladi. Odamlar oʻzi bilar-bilmas terib olgan qoʻziqorinlarni ovqatga ishlatishdan ehtiyot boʻlishi kerak. Qoʻziqorinlarning foydali xususiyatlari juda koʻp. Misol uchun, bu mahsulot immunitetni mustahkamlashga hissa qoʻshadi. Ulardagi letsetin moddasi tomirlarni tozalash va xolesterinni kamaytirishga yordam beradi, aterosklerozning oldini oladi.
Sodiq Odinayevning tajribasiga kelsak, u mahallada koʻplarga namuna boʻlib, bor imkoniyatdan unumli foydalanish harakatida boʻlgan fuqarolarni mehnat orqali daromad topishga ruhlantirmoqda.
Viloyat hokimligi matbuot xizmati