Buxoro viloyati hokimligi

Jamiyatda ayollar oʻrni va mavqeini oshirishda mahallalardagi xotin-qizlar faollarining rolini oshirish, xotin-qizlarni ijtimoiy qoʻllab-quvvatlash, oilalarni mustahkamlash hamda bu borada salmoqli natijalarga erishayotgan mahallalardagi xotin-qizlar faollari tajribasini ommalashtirish, “Ayollar daftari” tizimi doirasida xotin-qizlarning muammolarini hal etishda oʻzining fidokorona mehnati bilan barchaga namuna koʻrsatgan mahallalardagi xotin-qizlar faollarini munosib ragʻbatlantirish maqsadida “Eng yaxshi xotin-qizlar faoli” respublika tanlovi eʼlon qilingan.   

Oʻzbekiston Respublikasi Oliy Majlisi Senati Kengashining 2022-yil 27-apreldagi qaroriga muvofiq tashkil qilingan joriy yilgi  “Yil ayoli” milliy tanlovida Buxoro viloyati shahar va tumanlaridan 125 nafarga yaqin ayollarimiz ishtirok etgan boʻlsa, shundan 44 nafari viloyat bosqichiga saralab olingan.  “Gender tenglik faoli” milliy tanloviga esa 40 nafardan ziyod talabgor hujjat topshirgan.
“Eng yaxshi xotin-qizlar faoli” respublika tanlovining Buxoro viloyat bosqichida 516 ta mahallada faoliyat yuritayotgan 332 nafar mahalla xotin-qizlar faollaridan 13 nafari gʻoliblikni qoʻlga kiritgan. Viloyat bosqichiga oʻtgan talabgorlar tanlov komissiyalari tomonidan oʻrganilib, gʻoliblar aniqlandi.

Buxoro davlat tibbiyot institutida “Yil ayoli”, “Gender tenglik faoli”, “Eng yaxshi xotin-qizlar faoli” respublika tanlovlarining viloyat bosqichi gʻoliblarini taqdirlash marosimi boʻlib oʻtdi. Unda muvaffaqiyat qozongan xotin-qizlarni viloyat hokimining oʻrinbosari Hafiza Artikova, Oʻzbekiston mahallalari uyushmasi viloyat boshqarmasi boshligʻi Jamol Nosirov, O'zbekiston O‘zbekiston Xalq demokratik partiyasining Buxoro viloyati kengashi raisi Zulfiya To‘yevalar tabrikladilar.  

Tadbirda taʼkidlanganidek, inson qadrini ulugʻlash, avvalo, ayolga hurmat va ehtirom, moʻtabar onalarimizni eʼzozlash, munis opa-singillarimizni qadrlash orqali roʻyobga chiqadi, desak ayni haqiqatni aytgan boʻlamiz. Taʼkidlash joiz, bugungi kunda  mamlakatimizda amalga oshirilayotgan islohotlar ayollarning baxti asosiga qurilmoqda, desak adashmagan boʻlamiz.

Yuqoridagi fikrlarimiz eʼtirofi sifatida viloyatimiz boʻyicha ayni paytda 262 nafar xotin-qiz rahbarlik lavozimlariga zahiraga olingan, 60 nafar xotin-qiz rahbarlik lavozimlariga tavsiya etilgan, shundan 20 ga yaqin xotin-qiz rahbarlik lavozimlariga tayinlangan. Iqtidorli qizlarimiz soni mingdan oshdi.

Ayni paytda viloyatimizdagi 5 ta davlat oliy taʼlim muassasasida hamda 6 ta nodavlat oliy taʼlim dargohida faoliyat yuritadi. Viloyatimizda senator, davlat oliy taʼlimida rektor, shuningdek, prorektor ayollarimiz bor. Davlat oliy taʼlim tizimida 60 nafarga yaqin professor ayollar, 200 dan ortiq dotsent, 450 nafarga yaqin PhD ilmiy darajasidagi, yana oʻnlab DSc doktorant xotin-qizlarimiz faoliyat yuritishmoqda.

Har uchala tanlov yil sarhisobi hamdir. Oʻzbekiston Respublikasi Oliy Majlisi Senati, respublika Oila va xotin-qizlar qoʻmitasi, Xotin-qizlar oila va gender komissiyasi hamkorligida “Ayol – mehr-sadoqat va taraqqiyot timsoli” shiori ostida boʻlib oʻtgan maʼnaviy-madaniy tadbirda tanlov gʻoliblari tantanali ravishda taqdirlandilar.

Viloyat hokimligi matbuot xizmati