Shofirkon: paxtaobodlik Ibrohimovlar oilasi issiqxonadan 5 tonnadan ortiq pomidor olish taraddudida
2025-12-20 20:15:00 / Yangiliklar
Takroriy ekin sifatida shu yil sentyabr oyida tomorqachi oila aʼzolari serhosil “Azra” naviga mansub pomidorning 1 750 dona koʻchatini ekib, parvarishni davom etirdilar. Bugunga kelib yashnab turgan joʻyaklarda pomidor qizarib pishmoqda. Dehqon oila aʼzolari har bir tup koʻchatdan oʻrtacha 3,5 kilogrammdan, issiqxonadan qariyb 6 tonna hosil olish harakatidalar.
Issiqxona xoʻjaligi hisob-kitobni yoqtiradi. Deylik, pomidor koʻchati 2 300 soʻmdan xarid qilingan boʻlib, hademay, pishib yetilgan hosil bozorda aholi yangi yil dasurxoniga 20 ming soʻmdan sotilishi moʻljallangan. Bundan umumiy tushum 120 million soʻmni tashkil etishi kutilmoqda. Sarf-xarajatga kelsak, daromadning 40 million soʻmi ishlab chiqarish xarajatlariga, jumladan, koʻmir, mineral va organik oʻgʻitlar, ozuqa vositalari, koʻchat xaridi, elektr energiyasi, yer tayyorlash ishlariga yoʻnaltiriladi. Qarabsizki, tadbirkor bir mavsumdagi peshona teri evaziga 80 million soʻm atrofida sof foydaga ega chiqadi.
Pomidor ekishdan boshlab hosilni yigʻib olishgacha boʻlgan jarayon 4 oydan choʻziladi. Issiqxonada hosildorlikni oshirish maqsadida energiya tejamkor isitish tizimi hamda tomchilatib sugʻorish texnologiyasi joriy etilgan boʻlib, bu suv va energiya resurslaridan samarali foydalanish imkonini bermoqda.
Eʼtiborlisi, Ilgʻor Ibrohimov tadbirkorlik faoliyatini bir yoʻnalish bilan cheklab qolmagan. U 2024-yilda hokimning mahalladagi yordamchisi tavsiyasiga asosan, hududda tashlandiq holda boʻlgan zovur yer maydonini 10 yil muddatga ijaraga olib, bu yerda baliqchilik xoʻjaligini yoʻlga qoʻygan. Hovuzga 3 mingta atrofida baliq chavogʻi tashlansa, bir yillik parvarishdan soʻng bu 4 tonna “luqmai halol” boʻlib yetiladi. Bozorda baliqning narxi ayon, demak, bu tashabbus ham oila moddiy manfaatdorligiga xizmat qiladi.
Issiqxona tomorqachiligida katta tajribaga ega Ilgʻor Ibrohimov shu kunlarda qoʻshimcha issiqxona qurish, buning uchun avvalo yer maydoni olish harakatiga tushgan. Mahallada oilaviy tadbirkorlikni rivojlantirish, aholi bandligini taʼminlash, tomorqa yeridan samarali foydalanish borasida bu kabi ibratli saʼy-harakat davom etmoqda.
Viloyat hokimligi matbuot xizmati