Buxoro shahri: “Gʻafur Gʻulom” mahallasida yashovchi Azima Mirzayeva tikuv sexini ochdi
2025-12-20 17:00:00 / Yangiliklar
Xalqimizda “Hunarli kishi xor boʻlmas” degan hikmat bejiz aytilmagan. Darhaqiqat, hunarni puxta egalagan kishi hech qachon kam boʻlmaydi. Oʻrganilgan kasb-kor qancha sarf qilinmasin, kamayib qolmaydi. Tayinli hunar doimiy daromad manbai, farovon turmush vositasi hamdir.
Ana shunday, oʻz kasbining mohir ustalaridan biri Azima Mirzayeva—viloyat markazidagi Gʻafur Gʻulom mahallasida istiqomat qiladi. U oʻzining mehnatsevarligi, tashabbuskorligi va intiluvchanligi bilan tikuvchilik sohasida munosib natijalarga erishmoqda.
Tadbirkor ayolga aylangan chevarning tashabbusi mahalla maʼmuriyati tomonidan qoʻllab-quvvatlanib, unga subsidiya asosida toʻgʻri chok va “overlok” tikuv mashinalari olib berilgan. Natijada tikuvchilik faoliyati yoʻlga qoʻyildi. Dastlab uy sharoitida ish boshlagan Azima Mirzayeva keyinchalik faoliyat koʻlamini kengaytirib, ijaraga alohida joyiga ega boʻlib, tikuv sexini tashkil etdi. Muhimi, bu sexda chevarning oʻz qizi bilan birga bugun 2 nafar qoʻni-qoʻshni tikuvchining bandligi taʼminlanmoqda.
Azima Mirzayevaning tikuvchilik faoliyatidan olinayotgan oylik sof foydasi 5-6 million soʻmni tashkil etmoqda. Kunlik tushayotgan buyurtmalar oʻz vaqtida bejirim tikib tayyorlanib, mijozlar ishonchi qozonilmoqda. Ishchilarga esa ular mehnatiga yarasha, munosib ish haqi tayinlangan.
Viloyat hokimligi matbuot xizmati