Buxoro viloyati hokimligi

Tadbirning ochilish qismida “Umrboqiy meros” Oʻzbekiston madaniyati va sanʼatini targʻib etish markazi direktori Lutfiya Mirzayeva, Istanbul universiteti professori, “Umay ona” Turk dunyosi ayollar birligi hamda Ayol akademiklar uyushmasi (TÜRKKAB) raisi, professor Mualla Uydu Yujel hamda  Buxoro innovatsiyalar universiteti rektori, professor Dilnoza Roʻziyeva soʻzga chiqib, ayollarning akademik muhitdagi oʻrni, xalqaro ilmiy hamkorlik va zamonaviy taʼlimdagi dolzarb vazifalar haqida fikr bildirdilar.

Seminarning birinchi sessiyasida Oʻzbekiston Respublikasi Oliy Majlisi inson huquqlari boʻyicha Ombudsmanning Buxoro viloyatidagi vakili, professor Abyera Huseynova, Buxoro viloyati hokimining oʻrinbosari, oila va xotin-qizlar boshqarmasi boshligʻi, professor Hafiza Artikova, Toshkent amaliy fanlar universiteti dotsenti, “Shuhrat” medali sohibasi Ziyoda Gʻafforova, Oʻzbekiston Respublikasi Oliy Majlisi Senati huzuridagi “Tadbirkor ayollar klubi” raisi Mamlakat Sodiqova, Buxoro davlat pedagogika instituti professori Dildora Ahmedova hamda “Zumrad” nodavlat notijorat tashkiloti rahbari Zumrad Kenjayevalar maʼruzalari taqdim etildi. 

Maʼruzalarda Oʻzbekistonda ayol olimalarning ijtimoiy-iqtisodiy rivojlanishdagi oʻrni, ayollarni qoʻllab-quvvatlash mexanizmlari, xotin-qizlar tadbirkorligini rivojlantirish, ilmiy faoliyatdagi muammolar va fuqarolik jamiyatidagi faollik masalalari keng yoritildi.

Seminarning ikkinchi sessiyasida Turkiyaning Istanbul va Galatasaroy universitetlari, qardosh yurtning Bilejik Shayx Edebali universiteti, Anqara Hoji Bayram Veli universiteti va Qirqareli universiteti professor-oʻqituvchilari — Aysel Ilgin, Ebru Zeren, Dilara Uslu, Mashkura Yilmaz, Kameliya Tekne hamda professor Mualla Uydu Yujel tomonidan Turkiyada ayol akademiklarning bugungi faolligi, ilmiy izlanishlari, xalqaro qiyosiy tahlillar, ayollar tadqiqot markazlari faoliyati, ilmiy adabiyotlar va ilm-fan taraqqiyotiga munosib hissa qoʻshgan ayol akademiklar faoliyati yuzasidan muhim xulosalar bildirildi. Tadbir ayol akademiklar salohiyatini oshirish va ikki davlat oʻrtasidagi ilmiy hamkorlikni yanada mustahkamlashga xizmat qildi.

Viloyat hokimligi matbuot xizmati