Buxoro viloyati hokimligi

Maʼlumot oʻrnida taʼkidlash joizki, ayni paytda Buxoro viloyatidagi 151 ta umumtaʼlim maktabida 216 ta inklyuziv taʼlim sinflari tashkil etilgan boʻlib, ularda 280 nafar alohida taʼlimga ehtiyoji boʻlgan oʻquvchi qamrab olingan. Bu koʻrsatkichlar hududda inklyuziv taʼlimni bosqichma-bosqich joriy etish va taʼlimda teng imkoniyatlarni taʼminlash yoʻlida amalga oshirilayotgan izchil islohotlarning amaliy natijasidir.

Eʼtirof etish joizki, “Vision 2030 – Oʻzbekistonda taʼlim imkoniyatlarini kengaytirish: axborot-kommunikatsiya texnologiyalari va raqamli taʼlim orqali sifatli va inklyuziv taʼlim natijalariga erishish” hamda “Ishonch 2030” loyihalari Buxoro viloyatida nafaqat umumtaʼlim muassasalari, balki pedagog kadrlar salohiyatini oshirishga xizmat qilayotgan muhim tashabbuslardandir. Xususan, “Ishonch 2030” loyihasi doirasida Romitan tumanidagi 1-sonli, Kogon shahridagi 3-sonli hamda Buxoro shahridagi 45-sonli umumtaʼlim maktablarida inklyuziv taʼlim muhitini yaratish boʻyicha keng koʻlamli ishlar amalga oshirildi.

Tashrif Romitan tumanidagi 1-umumtaʼlim maktabidan boshlandi. Mehmonlar bu yerda tashkil etilgan inklyuziv taʼlim sinflari va STEM laboratoriyasi faoliyati bilan yaqindan tanishib, alohida taʼlimga ehtiyoji boʻlgan oʻquvchilar uchun yaratilgan shart-sharoitlarni koʻzdan kechirdilar. Ota-onalar va maktab jamoasi bilan boʻlib oʻtgan ochiq va samimiy muloqotlar inklyuziv taʼlimning ijtimoiy ahamiyatini yanada mustahkamladi.

Shundan soʻng mehmonlar Buxoro viloyat pedagogik mahorat markazida “Ishonch” jamgʻarmasining “Yuqori sifatli va inklyuziv taʼlim natijalariga erishish uchun axborot-kommunikatsiya texnologiyalari va raqamli taʼlimdan foydalanish” loyihasi doirasida tashkil etilgan anjumanda ishtirok etishdi. 

Tadbirni viloyat hokimi Botir Zaripov kirish soʻzi bilan ochib berdi. 

— Bugungi uchrashuvimiz yurtimizda taʼlim va sogʻliqni saqlash sohalarini yanada rivojlantirish, inklyuziv muhitni kuchaytirish hamda raqamli texnologiyalar orqali sifatli xizmatlar koʻrsatishga qaratilgan muhim tashabbuslar muhokamasiga bagʻishlangani bilan alohida ahamiyat kasb etadi.Ayni paytda amalga oshirilayotgan “Vision 2030 – Oʻzbekistonda taʼlim imkoniyatlarini kengaytirish: axborot-kommunikatsiya texnologiyalari va raqamli taʼlim orqali sifatli va inklyuziv taʼlim natijalariga erishish” hamda “Ishonch 2030” loyihalari viloyatimizda taʼlim va ijtimoiy infratuzilmani yangi bosqichga olib chiqishga xizmat qilmoqda, - dedi Botir Zaripov.

Soʻz – shunchaki niyat emas, u aniq amaliy ishlar bilan mustahkamlansa, natija beradi. Shu maʼnoda, “Ishonch 2030” loyihasi doirasida Buxoro viloyatidagi tugʻruq komplekslari bir qator zamonaviy tibbiy uskunalar bilan taʼminlandi. 

Birgina shu amal onalik va bolalikni muhofaza qilish, tibbiy xizmat sifatini oshirishga xizmat qilmoqda. Joriy holatda viloyatida 130 ta maktablarda inklyuziv taʼlim muhiti, shart-sharoitlari toʻla yaratilgan boʻlib, “Ishonch 2030” loyihasi doirasida Romitan tumanidagi 1-sonli, Kogon shahridagi 3-sonli hamda Buxoro shahridagi 45-sonli umumtaʼlim maktablarida inklyuziv taʼlim muhitini yaratish boʻyicha keng koʻlamli ishlar bajarildi. 

Mazkur namuna asosida bosqichma-bosqich qolgan 454 ta maktabda ham toʻliq inklyuziv taʼlim muhiti yaratilishi rejalashtirilgan. Tadbirda soʻzga chiqaanlar tomonidan oʻqituvchilarning kasbiy kompetensiyalarini rivojlantirish, raqamli va inklyuziv taʼlim metodlarini joriy etish masalalariga alohida eʼtibor qaratildi.

Shu kuni mehmonlar pedagogik mahorat markazi faoliyati bilan yaqindan tanishishdi. 

Shuningdek, ommaviy axborot vositalari vakillari ishtirokida matbuot anjumani ham boʻlib oʻtdi. Anjumanda loyiha natijalari, kelgusidagi rejalar yuzasidan batafsil maʼlumotlar berilib, jurnalistlarning savollariga atroflicha javoblar qaytarildi.

Shuningdek, delegatsiya Buxoro shahridagi 45-sonli umumtaʼlim maktabida boʻlib, maktab boʻylab ekskursiya davomida raqamli, STEM va inklyuziv sinflar faoliyati bilan yaqindan tanishdi. Maktab direktori va oʻqituvchilari bilan oʻtkazilgan suhbatlar jarayonida yaratilgan taʼlim muhiti, erishilgan natijalar hamda istiqboldagi rejalar muhokama qilindi.

Viloyat hokimligi matbuot xizmati