Kogon shahar: gaz quyish shaxobchasida oʻquv taktik qutqaruv tadbiri oʻtkazildi
2025-12-16 09:40:00 / Yangiliklar
Bunday hodisalar asoratli va oʻzidan katta miqyosdagi zarar yetkazishi barchani hushyorlikka chorlaydi. Kogon shahar favqulodda vaziyatlar boʻlimi tomonidan favqulodda vaziyatlarda harakat qilish davlat quyi tizimi xizmatlari bilan hamkorlikda hududdagi “Saneg” avtomobillarga siqilgan gaz quyish shaxobchasida oʻtkazilgan amaliy mashgʻulotlar “Tabiiy va texnogen xususiyatli favqulodda vaziyatlarda obyekt rahbariyati va tuzilma xizmatlarining hamkorlikdagi harakatlari mavzusiga bagʻishlandi.
Mashgʻulotlar davomida shartli ravishda gaz kompressorida sodir boʻlgan avariya vaqtida tuzilmalarining harakatlari amalga oshirildi. Dastlab avriya toʻgʻrisida tegishli tashkilotlar xabardor qilindi. Xabarga asosan avariya sodir boʻlgan gaz quyish yoʻlagidagi yongʻinni bartaraf etish maqsadida favqulodda vaziyatlar boʻlimi hamda tegishli xizmatlar yetib keldi. Birinchi nuqtadagi avtomobilda sodir boʻlgan yongʻin tezlikda bartaraf etildi. Zudlik bilan elektr taʼminoti xodimlari tomonidan elektr manbasi oʻchirilib, kompressor xonasidagi shartli yongʻinni oʻchirishga kirishildi.
Bu kabi yonish portlash xavfi mavjud obyektlarda yongʻinlarning yuzaga kelishi juda xavfli jarayondir. Sababi oʻz vaqtida oldi olinmagan yoki bartaraf etilmagan “tilsiz yov” keng yoyilishi va katta talofatlarga sabab boʻlishi mumkin. Shu kuni gaz siquv kompressorida yuzaga kelgan yongʻin qutqaruv avtomashinalari yordamida bartaraf etildi. Jabrlanganlar favqulodda vaziyatlar boshqarmasi qutqaruv otryadi tomonidan qutqarildi va ularga birinchi tibbiy yordam koʻrsatildi. Gaz taʼminoti xizmati zudlik bilan tizimdagi avariyalarni bartaraf etdi.
Bunday amaliy taktik mashgʻulotlarni oʻtkazishdan asosiy maqsad sodir boʻladigan yongʻinlarni tez fursatlarda va kam talofatlar bilan bartaraf etishdir.
Viloyat hokimligi matbuot xizmati