Buxoro viloyati hokimligi

Tumanda koʻchat oʻtqazish ishlari barcha yoʻnalishlarda bosqichma-bosqich amalga oshirilmoqda. Fermer xoʻjaliklariga 165 ming, bogʻ va tokzorlar barpo etish uchun 54 ming dona koʻchat ajratildi. Mahallalarda 150 ming nihol oʻtqazilishi belgilangan boʻlsa, Obodonlashtirish boshqarmasi tasarrufidagi hududlarga 47 mingdan ortiq koʻchat oʻtqazilmoqda. Oʻrmon fondi yerlari uchun esa 274 ming dona koʻchat ajratilgan.

Shuningdek, avtomobil yoʻllari boʻylari boʻylab 17 ming, kanal va ariqlar atrofini koʻkalamzorlashtirish maqsadida qariyb 20 ming dona koʻchat oʻtqazish harakati bormoqda. Maktablar, bogʻchalar, sogʻliqni saqlash muassasalari hamda texnikumlar hududida jami 22 ming tupga yaqin koʻchat oʻtqazilmoqda. Tijorat banklari va chiqindi poligonlari hududiga esa yana 16 ming tup nihol ajratilgan. Tumanda yangi tutzorlar barpo etish boʻyicha ham 94 ming tup koʻchat oʻtqazish ishlari davom etmoqda.

“Yashil makon” doirasidagi navbatdagi amaliy tadbir “Mingchinor” hududida tashkil etildi. Tuman hokimligi, korxona-tashkilotlar mehnat jamoalari  ishtirokida davlat oʻrmon xoʻjaligi agentligining tuman boʻlimi tasarrufidagi 20 gektar maydonda 17 ming tup koʻchat oʻtqazilishi rejalashtirilgan boʻlib, tadbir davomida 3,5 gektar maydon tozalanib, 2 ming tup  nihol oʻtqazildi.

Shu kuni koʻchat oʻtqazish tadbirida oʻrmon xoʻjaligi xodimlari bilan birga  200 nafarga yaqin fuqaro ishtirok etdi. Ishlarni sifatli tashkil etish uchun 10 taga yaqin maxsus texnika jalb qilindi.

Shofirkon tumanida amalga oshirilayotgan koʻkalamzorlashtirish ishlari “Yashil makon” umummilliy loyihasining hududlarda davom ettirilayotgani dalolati. Bugun oʻtqazilayotgan har bir tup nihol kelgusida tumanning ekologik muhitini yaxshilash, mahalla va qishloqlarni koʻkalamzorlashtirish, aholining hayot sifatini oshirishga xizmat qiladi. 

Viloyat hokimligi matbuot xizmati