Shofirkon: 33-sonli umumtaʼlim maktabi yangi sport zaliga ega boʻldi
2025-12-13 15:50:00 / Yangiliklar
Aynan shu maktab murabbiyi Sharof Homidov boshchiligida yengil atletikaning nayza uloqtirish yoʻnalishida shugʻullanayotgan 18 nafar oʻquvchi mahalliy va xalqaro miqyosdagi musobaqalarda yuqori natijalarni qayd etmoqda. Mamlakatimiz Olimpiya choʻqqilari musobaqalarining turli bosqichlarida oʻquvchilar muntazam ravishda kuchli “uchlik”dan joy olib kelishmoqda.
Maktab tarbiyalanuvchilari orasida yosh iqtidor egalaridan biri Parizoda Talabova. U nafaqat respublika bosqichida birinchi oʻrinni qoʻlga kiritgan, balki Bahrayn davlatida oʻtkazilgan III Osiyo yoshlar oʻyinlarida 53,8 metr natijani koʻrsatib, oltin medalni qoʻlga kiritgan. Shuningdek, Toshkent shahrida boʻlib oʻtgan Oʻzbekiston chempionatida ham Parizoda yana bir bor gʻoliblikni qoʻlga kiritgan boʻlsa, uning maktabdoshi Firdavs Farhodov koptokcha uloqtirish boʻyicha ikkinchi oʻringa sazovor boʻldi.
Sportda erishilayotgan muvaffaqiyatlarga qaramasdan, taʼlim dargohi moddiy-texnik imkoniyatlari talab darajasida emas, shu paytgacha risoladagiday sport zaliga ega emasdi. Nihoyat, xalq deputatlari viloyati Kengashining shu yil 24-fevraldagi qarori asosida mahalliy byudjet qoʻshimcha manbalari, ryespublika budjetidan ajratilgan ssuda va maqsadli mablagʻ hisobidan maktabga zamonaviy andozadagi sport zali qurib beriladigan boʻldi.
Gap “Quyi Chuqurak” MFY dagi 33-sonli umumtaʼlim maktabi xususida bormoqda. Bugunga kelib maskan jismoniy tarbiya mashgʻulotlarini samarali oʻtkazish, sport musobaqalarini tashkil etish hamda sogʻlom turmush tarzini rivojlantirishga xizmat qiladigan 12 metrga 24 metr oʻlchamli sport zaliga ega. Ayniqsa, sport bilan muntazam shugʻullanayotgan yoshlar uchun ham bu sport zali katta qulaylik yaratdi.
Sport inshootini foydalanishga topshirish tadbirida tuman mutasaddilari, xalq taʼlimi masʼullari, maktab jamoasi va mahalla faollari ishtirok etdilar. Ramziy alvon lenta qirqilgach, tadbirda yigʻilganlar sport zalni koʻzdan kechirdilar.
Maʼlumot uchun, bugunga kelib 33-sonli taʼlim dargohida 440 nafar oʻquvchi tahsil olmoqda. Ular taʼlim-tarbiyasi uchun 45 nafar oʻqituvchi pedagog jalb qilingan. Bunda barkamol avlod vakillariga talab darajasida taʼlim berish maqsadida oʻquv sinf xonalari, zarur inventarlar shay qilingan.
Viloyat hokimligi matbuot xizmati