Yaponiyaning Oʻzbekistondagi elchixonaci xodimi Misaki Aixara boshchiligidagi delegatsiya Buxoroda
2025-12-05 14:45:00 / Yangiliklar
Bugungi kunda davlatlarimiz oʻrtasida tibbiy kadrlarni tayyorlash, kasalliklar muolajasi va profilaktikasi, sohani raqamlashtirish, tibbiyot sohasi moddiy-texnika bazasini takomillashtirish kabi qator yoʻnalishlarda amalga oshirilayotgan qoʻshma loyihalar mamlakatimiz tibbiyot sohasini yanada taraqqiy etishiga xizmat qilmoqda.
Qayd etish joiz, yapon tibbiyotining erishgan yutuqlari, murakkab jarrohlik amaliyotlari, yuqori texnologik ilgʻor tashxislash usullari butun dunyoda odamlar salomatligini tiklash va kasalliklarning oldini olishda dasturilamal boʻlmoqda.
Kuni kecha, 4-dekabr kuni Yaponiyaning Oʻzbekistondagi elchixonasi xodimi Misaki Aixara boshchiligidagi delegatsiyasi viloyatimizda boʻlib, jumladan, respublika Shoshilinch tibbiy yordam ilmiy markazining Buxoro filiali faoliyati bilan yaqindan tanishdi. Tashrif davomida viloyatimizda shoshilinch tibbiy yordam xizmati koʻrsatish sifatini rivojlantirish bilan bogʻliq loyihalarga asoslangan xalqaro miqyosdagi oʻzaro shartnomalar imzolandi.
RSHTYOIM rahbariyati bilan muloqot chogʻida Misaki Aixara Yaponiya bundan keyin ham Oʻzbekistonda yuqori sifatli tibbiy xizmatlardan foydalanish imkoniyatlarini yaxshilash yoʻlidagi hamkorlikka tayyor ekanini bildirdi. Albatta, mazkur ikki tomonlama muloqot va doʻstona munosabatlar Oʻzbekiston va Yaponiya oʻrtasidagi doʻstona aloqalarning yanada mustahkamlanishiga xizmat qiladi.
Viloyat hokimligi matbuot xizmati