Olot: Maʼmura Ergashova issiqxonasida bulgʻor qalampiridan 40 million soʻm daromadni koʻzlagan
2025-12-04 16:25:00 / Yangiliklar
Shu yil avgust oyi oʻrtalarida bu moʻjaz issiqxona yeri tayyorlanib, unda “toʻqsonbosti” uslubida jami 1 ming 100 tup bulgʻor qalampiri koʻchati oʻtqazilgan. Koʻchatlar bugunga kelib koʻzga koʻrinarli hosil bera boshlagan. Dastlabki yigʻim davomida 200 kilogrammdan ortiq bulgʻor qalampiri sotilgan va ularning har bir kilogrami bozorda oʻrtacha 20 ming soʻmdan xaridorlarga yetkazilgan.
Mutaxassislar hisob-kitobiga koʻra, bulgʻor qalampirining har bir koʻchati oʻrtacha 2 kilogram hosil berishi kutilmoqda. Bu esa issiqxonada mavsum davomida 40 million soʻmdan oshirib daromad keltirishidan dalolat beradi.
Maʼmura Ergashovaning aytishicha, issiqxona tashkil etib, unda hosil yetishtirishning ham qiyinchiligi bor, albatta. Asosiysi, intilish, myehnat va eʼtibor boʻlsa, hosilga yetish, moddiy manfaatdorlikka emin-erkin erishish mumkin. Xalqimizning yerga mehr bersang, u seni hech qachon kam qilmaydi, degan purmaʼno gaplari bejiz aytilmagan.
Eʼtiborlisi, olis tuman mahalla va qishloqlarida ham koʻplab oilalar tomorqadan oqilona foydalanib, hovlisi etagida ixcham issiqxonalar qurib, qishda ham rezavor, koʻkatlar, sabzavot mahsulotlari ekib yetishtirmoqda. Bu esa yil davomida roʻzgʻor ehtiyojini qondirish, oilaviy daromad topish, qolaversa, mahalladoshlar dasturxonini toʻkin qilish imkonini bermoqda. Maʼmura Ergashovaning tomorqachilikdagi tajribasi va erishayotgan yutugʻi bu borada ibrat boʻlarli dalil.
Viloyat hokimligi matbuot xizmati