Buxoro viloyati hokimligi

Bugun, 4-dekabr kuni  viloyat hokimi Botir Zaripov Janubiy Koreyaning sunʼiy intelektni oʻqitishga asoslangan ENOZ (English Networking Zone/collaboration and information exchange) taʼlim muassasasi direktori Park Chang Hong, taʼlim muassasasining kontent tayyorlash boʻyicha oʻrinbosari Heo Seung Wonni qabul qildi. 

Taʼkidlash lozimki, Buxoro shahridagi 42-ixtisoslashtirilgan davlat umumtaʼlim maktabi Janubiy Koreya taʼlim muassasalari bilan mustahkam aloqa oʻrnatgan. Bu yerda yetti yildirki, oʻquvchilarga koreys tilidan ham saboq beriladi. Qolaversa, mazkur taʼlim maskanida va Gʻijduvon tumanidagi maktablarda ENOZ  taʼlim muassasasi bilan hamkorlikda AI–ICT oʻquv xonalari hamda qisqa muddatli amaliy dasturlar ishlab chiqilgan. Loyiha oʻquvchilarga dasturlash, robototexnika, generativ sunʼiy intellekt, virtual reallik (VR–virtual muhit texnologiyasi), kengaytirilgan reallik (AR–qoʻshimcha reallik), hamda internet buyumlari tizimi (IoT – aqlli qurilmalar tarmogʻi) boʻyicha zamonaviy koʻnikmalar berishga qaratilgan.

Uchrashuvda Koreya davlatida maktab taʼlim tizimida sunʼiy intelektni joriy etilgan maktablar tajribasi oʻrganilib, viloyatdagi maktablarga joriy etish boʻyicha hamkorlik oʻrnatish masalalari koʻrib chiqildi. 

Muloqot davomida ENOZ (English Networking Zone/collaboration and information exchange) taʼlim muassasasining kontent tayyorlash boʻyicha oʻrinbosari Heo Seung Won Buxoro viloyatidagi maktablarga sunʼiy intelektni joriy qilish yuzasidan taqdimot qildi. 

Taqdimotda taʼilanganiyek, 42-umumtaʼlim maktabi uchun taklif etilayotgan oʻquv modeli uch asosiy bosqichdan iborat: oʻqituvchilar uchun 3 oylik tayyorlov kursi, oʻquvchilar uchun 3 oylk umumiy texnologik kurs hamda 1 oylik maxsus klub dasturi. Oʻquv kursini tugatgan oʻqituvchilar tuman-shaharlardagi oʻqituvchilarni kaskad usulida tayyorlaydi. Klub doirasida Python, LUA, IoT, robototexnika va 3D oʻyin yaratish boʻyicha amaliy mashgʻulotlar oʻtkaziladi.

Gʻijduvon tumanidagi maktablar uchun esa intensiv IT-klub modeli taklif etilgan boʻlib, unda kodlash, VR, robototexnika, veb-dasturlash va generativ AI boʻyicha qisqa modullar joy olgan. Bu hududlarda AI kompetensiyalarini tez shakllantirishga xizmat qiladi.

Ushbu xarajatlar AI asoslari, Python/HTML, LUA/Roblox, VR, IoT, veb-dizayn va multimedia boʻyicha mashgʻulotlarni qamrab oladi. Trening xarajatlari ENOZ tomonidan moliyalashtirilishi koʻzda tutilgan. 

Amalga oshirish bosqichlari sentyabr–oktyabr oylarida tayyorgarlik va jihozlash, noyabrda oʻqituvchi va oʻquvchi kurslari, dekabrda Koreya bilan tajriba almashinuvi bilan yakunlanadi. Natijada oʻquvchilar AI orqali rasm, video, musiqa, 3D loyihalar va VR oʻyinlari yaratish qobiliyatiga ega boʻladi, maktablar esa hududiy AI markaziga aylantiriladi.

Botir Zaripov mazkur loyiha barcha yoʻnalishlar, xususan, maktab taʼlimi uchun ham juda muhim ekanligini alohida taʼkidladi va bunday raqamli taʼlimni joriy etishni qoʻllab- quvvatlashga tayyorligini bildirdi.

Loyiha doirasida Buxoro shahridagi 42-umumtaʼlim maktabida tayanch maktabi tashkil etilishi, tayanch maktabda ENOZ taʼlim muassasasi bilan hamkorlikda trener-oʻquvchi va trener-oʻqituvchilar tayyorlanishi yuzasidan kelishuvga erishildi.

Kelishuvga koʻra, ENOZ taʼlim muassasasining trener-oʻqituvchilari belgilangan oʻquv-dasturlar asosida tayanch maktabda 2-4 oylik oʻquv va amaliy mashgʻulotlar tashkil etadi. 

Viloyat hokimligi matbuot xizmati