Buxoro viloyati hokimligi

Jumladan, shu yil erta bahoridan tuman hokimligidan 6 turdagi oʻrik, gilos, shaftoli, olma, behi va qaroli kabi 21 ming tup mevali daraxt niholi har bir mahallaga 450 tupdan tarqatilib, oʻtqazilgan va parvarishlanmoqda. Tuman maktabgacha va maktab taʼlimi boʻlimiga qarashli 42 ta taʼlim muassasasida ”Yashil makon” umummilliy loyihasi doirasida 30 ming tupga yaqin koʻchat va qalamcha oʻtqazilib, parvarishlanmoqda. Mazkur xayrli harakat va aksiya doirasida oʻtqazilgan mevali va manzarali koʻchatlarni sugʻorish va parvarishlash uchun barcha hududda masʼullar biriktirilgan.  

Shu kunlarda esa “Latifsobungar” MFYda faoliyat yuritayotgan "Rustamov Azizjon" fermer xoʻjaligi bogʻida tuman hokimligi va qishloq xoʻjaligi boshqarmasi tashabbusi bilan “Qishloq xoʻjaligi xodimlari bogʻi”ga asos solindi. Fermer xoʻjaligi bogʻidan ajratilgan joyda serhosil navlarga mansub oʻrik daraxti nihollari oʻtkazilib, parvarishlanmoqda. 

— Xalqimizda  “Yaxshidan bogʻ qoladi” degan ezgu naql bejiz aytilmagan. Keksa nuroniylarning tashabbusi bilan tashkil qilinayotgan bogʻ ham ijtimoiy,  ham tarbiyaviy ahamiyatga ega ekanini eʼtirof etish joiz,—deydi tuman hokimining oʻrnbosari Ozod Noʻkarov.—–Bugun oʻtqazilib parvarishlanayotgan  nihollar kun kelib meva beradi, soya solib dam olishga sharoit yaratadi, ekologiyani tozalaydi, shamol yoʻliga toʻsiq boʻladi, yerning meliorativ holatini yaxshilaydi. Asosiysi, bugun boʻsh yerda barpo qilinayotgan bu bogʻ saxovatpesha tabiatimiz kuchi bilan erta-indin koʻzimizni quvontiradi.

Tadbirda qatnashib, koʻchat oʻtqazgan tuman masʼullari  barcha mahalla va qishloq, taʼlim maskanlari, mehnat jamoalarida koʻkalamzorlashtirish, mevali va manzarali daraxt nihollarini oʻtqazish, “yashil hudud”lar barpo etish ishlarini yanada kengaytirish zarurligini, bu xayrli amallar ona tabiatni asrashda muhim ahamiyatga ega ekanini taʼkidladilar. 

Viloyat hokimligi matbuot xizmati