Kogon tumani: Suxor mahallasida “Madaniyat va istirohat bogʻi" tashkil etilmoqda
2025-12-01 11:00:00 / Yangiliklar
Tuman yoʻllardan foydalanish korxonasi ishchi-mutaxassislari tomonidan oʻtgan oyda Suxor mahallasining Buyuk Turon, Yangi hayot hamda Said Amir Kulol koʻchalarida joriy taʼmirlash dasturi asosida 600 metrdan ortiq ichki yoʻl qismi asfaltlashtirilgani aholi uchun katta qulaylik va koʻpdan kutilgan yangilik boʻldi.
Aholiga savdo va maishiy xizmat koʻrsatish sifatini yaxshilash maqsadida ikki yil burun suxorlik tadbirkor Bahodir Fayziyev tashabbusi bilan “Bahoroy” savdo majmuasi qurib foydalanishga topshirilgan. Maydoni 11 sotix yerdan iborat mazkur ikki qavatli zamonaviy inshootda bugunga kelib novvoyxona, goʻzallik saloni va sartaroshxona, qandolat mahsulotlari, tikuvchilik sexlari, shuningdek, mini market, kundalik ish jihozlari, oziq-ovqat savdo doʻkonlari bilan birga, oʻquv markazi faoliyat yuritmoqda. Muhimi, mazkur tadbirkorlik subyekti tufayli hozirda “Bahoroy” savdo majmuasida jami 24 nafar fuqaroning bandligi taʼminlanmoqda.
Xuddi shunday, hududda ekologik muhitni yaxshilash, “yashil maydon”ni kengaytirish va aholiga qulay dam olish muhitini yaratish maqsadida “Yashil makon” umummilliy loyihasi doirasidagi ishlar izchil davom etmoqda. Bu xayrli tashabbus mahalla va qishloqlarimizni yashillikka burkash, koʻkalamzorlashtirishga, yurtdoshlarimiz hayoti uchun musaffo havo yetishtirishga xizmat qilmoqda. Bu borada Kogon tumanidagi yoʻl boʻylariga, tashkilot, korxona va muassasalar, xonadonlardagi boʻsh yer maydonlariga mevali va manzarali daraxt koʻchatlari oʻtqazilmoqda.
Aynan “Suxor” mahalla fuqarolar yigʻinida aholi dam olishi va madaniy-estetik hordiq chiqarishi uchun "Madaniyat va istirohat bogʻi" barpo etishga kirishilgan. Shu kunlarda "Yashil makon" umummilliy loyihasi doirasida 6 gektar maydonga 10 ming tupdan ortiq chinnigujum, akatsiya, katalpa, qayragʻoch, chinor, klyon, yasin kabi noyob manzarali daraxt koʻchatlari oʻtqazilmoqda.
Shu oʻrinda aytish joizki, tumanda "Yashil makon" umumilliy loyihasiga asosan joriy yil yakunigacha 500 mingdan ortiq daraxt va buta koʻchatlari oʻtqazilmoqda.
Viloyat hokimligi matbuot xizmati