Buxoro viloyati hokimligi

Mamlakatimizda davlatimiz rahbarining tibbiyot sohasini rivojlantirish va aholiga malakali sifatli hamda samarali tibbiy  yordamni tashkil qilish uchun qaratilayotgan eʼtibori va keng yoʻl ochib berilgani, hukumatning tibbiyot tizimida olib borayotgan izchil islohotlari tufayli Ryespublika Shoshilinch tibbiy yordam ilmiy markazi Buxoro filialida kam invaziv endoskopik amaliyotlarni amalda tadbiq qilish tajribasi oʻzlashtirilmoqda. 

Filialda endoskopik amaliyotlarni qoʻllash maqsadida Janubiy Koreya, Germaniya, Turkiya, Rossiya kabi xorij davlatlari ilgʻor tajribasi, jarrohlikdagi muvaffaqiyatlari oʻzlashtirilmoqda. Buni "Tibbiyotni xalqqa yaqinlashtirish" strategiyasi doirasida yuqori texnologik tibbiy xizmatlarni joylarda yoʻlga qoʻyish va murakkab operatsiyalar turini kengaytirish boʻyicha izchil islohotlar amalga oshirilayotgani bilan izohlash mumkin. Endilikda yuqori malakali, kam invaziv jarrohlik amaliyotlari viloyat markazlarida ham muvaffaqiyatli bajarilmoqda.

Yaqinda RSHTYOIM Buxoro filialiga 52 yoshli bemor, qorinning barcha sohasida kuchli ogʻriq, qorin dam boʻlishi, ichqotish va koʻngil aynishi klinik shikoyatlari bilan ogʻrigan M. Xoʻjayev qabul qilindi. Chuqur diagnostik tahlillar jarayonida bemorda toʻgʻri ichak oʻsmasi tufayli ichak boʻshligʻi yopilib, ichak oʻtmasligi yuzaga kelgani aniqlandi.

Shoshilinch xirurgiya boʻlimi malakali jarrohlari tomonidan tezkorlik bilan bemorga laparoskopiya, qorin boʻshligʻini reviziya qilish, toʻgʻri ichak rezeksiyasi va kolorektal anastomoz qoʻyish amaliyoti birinchi bor muvaffaqiyatli amalga oshirildi. Aytish joizki, bunday kasalliklar uchun shu kunga qadar bemorlar boshqa shaharlarga, poytaxt tibbiyot muassasalariga  borishga majbur boʻlishgan. Muhimi, amaliyotdan soʻng bemor bir necha kun vrach nazorati ostida boʻlib, sogʻligʻi barqarorlashgach, ambulator kuzatuvga yuborildi.

Bunday yuqori texnologiyali operatsiyalarning joriy etilishi nogironlik holatlarini kamaytirish, aholi salomatligini mustahkamlash, viloyatlarda yuqori malakali tibbiy xizmat koʻrsatish sifatini oshirish, shuningdek, bemorlarning ortiqcha avoragarchiliklari oldini olishga xizmat qiladi. 

Viloyat hokimligi matbuot xizmati