Viloyat hokimiga murojaatdan soʻng: Qorakoʻl tumanining “Chandirobod” va “Qozon” mahallalaridagi oilaviy shifokorlik punktlari ham yangi qiyofaga kirdi
2025-11-20 20:05:00 / Yangiliklar
Bu yangilanish yurtimizda tibbiyot tizimini rivojlantirish, aholiga tibbiyotni yaqinlashtirish, ularga sifatli tibbiy xizmat koʻrsatish davlat siyosatining ustuvor yoʻnalishiga aylangani yaqqol namunasi. Ushbu zamonaviy maskanlar orqali aholi salomatligini oʻz vaqtida tekshirtirish, kasalliklarni erta aniqlash va sifatli tibbiy xizmatdan foydalanish imkoniyati yaratildi.
Yangi va zamonaviy tibbiyot muassasalarini foydalanishga topshirish marosimida tuman hokimligi, tibbiyot birlashmasi masʼullari, mahalla faollari ishtirok etishdi.
“Chandirobod” aholisi yillar davomida oʻtgan asr yetmishinchi yillarida qurilgan va soʻnggi paytda yaroqsiz koʻrinishga kelib, bugunning talablariga javob bermaydigan eski binodagi tibbiyot xodimlari xizmatidan foydalanib kelgan. Aholining sayyor qabullarda viloyat hokimiga bildirgan murojaatlarini inobatga olib, yangi shifokorlik punkti dasturga kiritildi. “Qozon” mahallasidagi tibbiyot punkti esa “Chandirobod”dagi maskandan ham oldin barpo qilingan va moslashtirilgan sharoitda qishloq odamlariga tibbiy xizmat koʻrsatib kelingan.
Endilikda esa chandirobodlik va qozonlik aholi uchun umumiy qiymati 3 milliard soʻm mablagʻ hisobidan qayta qurilgan, zamon talablari darajasidagi ikki yangi bino shay qilingani koʻpdan kutilgan yangilik boʻldi. Muassasalarning har biri kunlik qabul quvvati 50 qatnovga moʻljallangan. Muhimi, barcha shart-sharoit hozirlangan har ikki shifokorlik punktida jami 40 nafardan oshiq tibbiyot xodimi aholi salomatligiga jalb qilinmoqda.
Poliklinikalar yorugʻ va shinam qabul boʻlimlari, emlash, patronaj, laboratoriya xonalari, kutish zali, shuningdek, zarur diagnostika jihozlari, sanitariya va issiqlik tarmoqlariga ega. Shuningdek, ikki muassasa toʻliq “Davlat tibbiy xizmatlari raqamlashtirish tizimi”ga ulangan. Endilikda bemorlar navbatda ortiqcha vaqt yoʻqotmaydi, jarayon elektron tarzda, koʻrsatiladigan xizmatlar esa tez va bepul tarzda amalga oshiriladi.
Binolarning ramziy lentasi qirqilgach, tadbirda yigʻilganlar inshootda yaratilgan shart-sharoit bilan yaqindan tanishdilar.
Foydalanishga topshirilgan yangi oilaviy shifokorlik punktlari aholiga yaratilayotgan qulaylik va gʻamxoʻrlikning amaldagi ifodasidir.
Viloyat hokimligi matbuot xizmati