Buxoro viloyati hokimligi

Bagʻrikeng xalqimizning azaliy qadriyatlari, ulugʻ ajdodlarning donishmandlik anʼanalariga amal qilib, bugun Oʻzbekiston oʻz taraqqiyotining yangi bosqichiga qadam qoʻydi. Buni mamlakatimizning tashqi va ichki siyosatidan tortib, iqtisodiy ijtimoiy, madaniy hamda diniy-maʼrifiy sohalaridagi tub islohotlar misolida ham yaqqol koʻrish mumkin. Jumladan, soʻnggi yillarda mamlakatimizda turli millat va konfessiyalar oʻrtasida oʻzaro hurmat, birdamlik va hamkorlik muhitini mustahkamlash, madaniyatlararo muloqotni qoʻllab-quvvatlash hamda tinchlik-totuvlikni taʼminlashga qaratilgan izchil va puxta oʻylangan siyosat xalqaro hamjamiyat tomonidan toʻliq qoʻllab-quvvatlanmoqda. Binobarin, xalqimizning qon-qoniga singib ketgan bagʻrikenglik anʼanasi doimo qoʻllab-quvvatlanib, ragʻbatlantirilib kelinmoqda. 

Shu nuqtayi nazardan, hozirda respublikada hamda barcha viloyatlarda “Bagʻrikenglik haftaligi” doirasida “Yangi Oʻzbekistonda diniy bagʻrikenglik”, “Biz bir mamlakatda yashayotgan yagona xalqmiz”, “Millatlararo totuvlik—tinchlik garovi”, “Oʻzbekiston bagʻri keng diyor” mavzularida maʼnaviy-maʼrifiy, madaniy tadbirlar tantana bilan oʻtkazilmoqda.

Oʻzbekiston Respublikasi Vazirlar Mahkamasining 2023-yil 25-sentyabrdagi “Diniy bagʻrikenglik” koʻkrak nishonini taʼsis etish toʻgʻrisida”gi qaroriga muvofiq,  koʻkrak nishoni bilan diniy-maʼrifiy sohadagi islohotlarni targʻib etish, fuqarolar eʼtiqod erkinligini taʼminlash, dinlararo hamjihatlikni mustahkamlash va maʼnaviy muhit barqarorligini saqlashdagi ibratli ishlari uchun yurtdoshlarimiz, yetuk ulamolar, atoqli arboblar, diniy soha rahbarlari, xalqaro tashkilotlar vakillari hamda xorijiy olimlar taqdirlanishi belgilangan.

Quvonarlisi, bu yilgi taqdirlangan mazkur mukofot sohiblari qatorida 6 nafar viloyatimiz vakillarining ham borligi barchamizda faxr-iftixor tuygʻularini uygʻotadi. Bundaylar soni 2023-yilda 8 nafarni, 2024-yilda 5 nafar soha vakillarini tashkil etgan. 

Shu munosabat bilan Mir arab oliy madrasasida Yangi Oʻzbekistonning yana bir mukofoti “Diniy bagʻrikenglik” koʻkrak nishonini  oʻz sohiblariga taqdim etish tadbiri boʻlib oʻtdi. 

Unda viloyat hokimining oʻrinbosari Azizbek Qalandarov, viloyat bosh imom-xatibi, Mir arab oliy madrasasi rektori Jobir Elovlar soʻzga chiqib, yurtimizda diniy-maʼrifiy soha rivoji yoʻlida olib borilayotgan izchil saʼy-harakat xususida  toʻxtalib, yuksak eʼtirofga sazovor boʻlgan viloyatdoshlarimizni samimiy tabrikladilar. Shundan soʻng yuksak mukofot—koʻkrak nishonlari oʻz  egalariga topshirildi.

Yurtimizda davlatimiz rahbari tomonidan diniy-maʼrifiy sohada amalga oshirilayotgan ishlar natijasida fuqarolarning vijdon erkinligi, din va millatlararo totuvlik taʼminlanayotgani, mazkur nishonning taʼsis etilgani esa hukumatimizning diniy sohaga boʻlgan yuksak eʼtiborining yaqqol namunasi ekani taʼkidlandi. 

Viloyat hokimligi matbuot xizmati