Olot: axborot texnologiyalari asrida tuman kutubxonasi ham raqamli imkoniyatlardan keng foydalanmoqda
2025-11-11 12:20:00 / Yangiliklar
Kutubxona fondida 38 ming 803 nomda, jami 115 ming 413 nusxa kitob mavjud. Shundan 23 ming 492 nomdagi, 75 ming 153 nusxa badiiy adabiyotlarni tashkil etadi. Yozuv turlari boʻyicha fond quyidagicha shakllangan, yaʼni lotin alifbosida 4 ming 95 nomda, 8 ming 516 nusxa, kirill alifbosida 17 ming 243 nomda, 51 ming 69 nusxa adabiyot. Tillar kesimida esa kutubxona fondi yanada boy va rang-barang: oʻzbek tilida 21 ming 338 nomda, 59 ming 585 nusxa, rus tilida 17 ming 269 nomda, 55 ming 427 nusxa, boshqa tillarda – 188 nomda, 378 nusxa kitob mavjud.
Joriy yilda markaz moddiy-texnik bazasini yanada mustahkamlash maqsadida 240 million soʻmlik yangi kitob javoni va mebel jihozlari, 35 million soʻmlik 325 nomda, 620 nusxada badiiy hamda ilmiy adabiyotlar xarid qilingan. Shuningdek, 9 ta kompyuter jamlanmasi sotib olingan.
Shu yil 1-noyabr kuniga qadar markazda yuzdan oshiq maʼnaviy-maʼrifiy tadbir oʻtkazilib, ularda 6 ming 737 nafar foydalanuvchi ishtirok etgan. Shundan 2 ming 32 nafari yangi aʼzolar boʻlib, bu koʻrsatkich kutubxona faoliyatiga boʻlgan qiziqish ortib borayotgani dalolati.
Axborot texnologiyalari asrida Olot tuman kutubxonasi ham raqamli imkoniyatlardan keng foydalanmoqda. 2025-yilning 10 oyi davomida markazning elektron kutubxonasiga 845 ta elektron kitob joylashtirilgan. Shuningdek, 143 ta elektron kitobga “QR” kod yaratilgan boʻlib, ular aholi uchun qulay tarzda maxsus tablolar orqali taqdim etilgan.
Kutubxona xodimlari bilim va tajribasini oshirish maqsadida Alisher Navoiy nomidagi Oʻzbekiston Milliy kutubxonasi hamda respublika Axborot-kutubxona markazi tomonidan tashkil etilgan oʻquv kurslarida muntazam ishtirok etmoqda. Shu maqsadda tuman byudjetidan ajratilgan mablagʻ evaziga 4 nafar xodim poytaxtda malaka oshirish kurslarini muvaffaqiyatli yakunladi.
Ayni kunda Olot tuman Axborot-kutubxona markazi nafaqat kitob oʻqiladigan joy, balki yoshlar va aholining har bir qatlamini maʼnaviy barkamollikka, ilm va tafakkur sari yetaklovchi haqiqiy maʼnaviyat maskaniga aylanib bormoqda. Bunda yangi imkoniyatlar, zamonaviy sharoitlar va elektron resurslar orqali kutubxona oʻz oʻquvchilariga yanada yaqinlashmoqda.
Viloyat hokimligi matbuot xizmati