Buxoro viloyati hokimligi

Nurafshon mahallasida faoliyat yuritayotgan 36-sonli mumtaʼlim maktabida yangi, zamonaviy oʻquv binosining tantanali ochilish marosimida tuman hokimligi, jamoatchilik vakillari, xalq taʼlimi boʻlimi mutasaddilari, oʻqituvchilar, ota-onalar hamda mahalla faollari ishtirok etdilar.

Tadbirda maktab jamoasi, faol oʻqituvchilar va oʻquvchilarga esdalik sovgʻalari topshirildi. Shuningdek, marosim ishtirokchilari yangi binodagi sinfxonalar, fan laboratoriyalari va oʻquv xonalarini koʻzdan kechirdilar.

Bugunga kelib mazkur 36-sonli umumtaʼlim maktabida 493 nafar oʻquvchi tahsil olmoqda. Ularga 50 nafar oʻqituvchi saboq bermoqda. Shundan 7 nafari oliy toifali, 12 nafari birinchi toifali oʻqituvchilardir. 2024–2025 oʻquv yilida taʼlim dargohini 33 nafar oʻquvchi bitirib, ularning 22 nafari oliy taʼlim muassasalariga oʻqishga kirgan, 2 nafari harbiy xizmatga yoʻnaltirilgan, 9 nafari esa ish bilan taʼminlangan.

Maktab oʻquvchilari turli fan olimpiadalari va tanlovlarda ham munosib natijalarga erishib kelishmoqda. Jumladan, 9-sinf oʻquvchisi Shahriyor Obidov  ingliz tili fanidan tuman bosqichida gʻolib boʻlib, viloyat bosqichiga yoʻllanma oldi. 8 “B” sinf oʻquvchisi Abduqamar Qamariddinov ham “Jadidlar izidan” tanlovida tuman bosqichida tengsizligini isbotlab, 1-oʻrinni egalladi va tanlovning viloyat bosqichiga chiqdi. Xuddi shunday, 11-sinf oʻquvchisi Feruza Davronova “Raqamli avlod qizlari” tanlovining viloyat bosqichida ishtirok etish huquqini qoʻlga kiritdi. Bunday misollarni yana davom ettirish mumkin.  

Maktabning fidoyi oʻqituvchilari ham oʻz kasbiy mahoratlarini oshirib bormoqdalar. Bugunga kelib 8 nafar oʻqituvchi Milliy sertifikatga,  boshlangʻich sinf oʻqituvchisi Sitora Fayziyeva esa Oʻzbekiston Respublikasi Vazirlar Mahkamasining shu yil 28-fevraldagi 130-sonli qaroriga muvofiq, “Vazir ustamasi” bilan taqdirlangan. Oʻquvchilardan 1 nafari ingliz tili fanidan xalqaro darajadagi sertifikat, 5 nafari esa milliy sertifikatga ega boʻlgan. Bu esa maktabdagi taʼlim sifati va oʻqituvchilar mehnatining amaliy eʼtirofidir. 

Yangi 120 oʻrinli oʻquv binosi barcha shart-sharoitga ega boʻlib, kompyuter sinfi, kutubxona, tabiiy fanlar uchun jihozlangan laboratoriyalar, issiqlik tarmogʻi, sport maydonchasi va zamonaviy mebellariga ega. Albatta, bu kabi qulay oʻquv muhiti mahalliy yoshlarning bilim olishi, tafakkurini kengaytirishi va kelajakda yetuk mutaxassis boʻlib yetishishiga zamin yaratadi.

Viloyat hokimligi matbuot  xizmati