Gʻijduvonda zamonaviy sport yakkakurashlari va dzyudo zali foydalanishga topshirildi
2025-11-06 15:50:00 / Yangiliklar
Yengil konstruksiyali, 15 metrga 30 metr hajmda bunyod qilingan yakkakurash zali qurilishi uchun mahalliy byudjet mablagʻi hisobidan 1 milliard 500 million soʻm mablagʻ ajratildi.
Ushbu sport zalida bir paytda sportning erkin kurash, yunon-rum kurashi, dzyu-do turlari boʻyicha 70 nafar sportchi mashgʻulotlarga qatnash imkoniga ega. Bir kunda yopiq sport inshooti 200 dan oshiq sportsevarni oʻz bagʻriga olishi mumkin. Yosh sportsevarlar uchun bunda 6 nafar murabbiy jalb qilingan.
Zamonaviy tipda bunyod qilingan mazkur inshootni foydalanishga topshirish marosimida ishtirok etgan viloyat hokimi Botir Zaripov barchani yana bir yangi inshoot bilan tabrikladi.
Qadimiy qadriyatlarimiz, xususan, mardlik, jasurlik, vatanparvarlik gʻoyalarini oʻzida mujassam etgan milliy sportimiz boʻlgan kurash, jozibador dzyu-do kabi sport turlarini ommalashtirish, rivojlantirish va dunyoga tanitishda shu bino muhim vosita boʻlishi hamda bu yerdan Osiyo, jahon va Olimpiya chempionlari yetishib chiqishiga ishonch bildirildi.
Eʼtiborlisi, yakkakurash turlariga ixtisoslashgan zalda qishda ham bemalol sport bilan shugʻullanish uchun zarur inventarlar bilan birga isitish tizimi, sanitariya tarmogʻi shay qilingan.
Viloyat hokimligi matbuot xizmati