“Manfaatlar to‘qnashuvi to‘g‘risida”gi Qonun bilan davlat organlari yoki boshqa tashkilotlar xodimlarining va ularga aloqador shaxslarning manfaatlar to‘qnashuvi bilan bog‘liq munosabatlarni tartibga solish chog‘idagi huquq va majburiyatlari belgilangan.

O‘z navbatida, O‘zbekiston Respublikasi Bosh vazirining topshirig‘i bilan “Manfaatlar to‘qnashuvi to‘g‘risida”gi Qonun kuchga kirguniga qadar unda belgilangan talablar va mexanizmlarning amaliyotda ishlashi bilan bog‘liq masalalarni mahalliy davlat hokimiyati organlarida o‘rganish bo‘yicha adliya vaziri o‘rinbosari rahbarligida ishchi guruh tashkil etilgan.

“Manfaatlar to‘qnashuvi to‘g‘risida”gi Qonun ijrosini tashkil etish ishlarini muvofiqlashtirish bo‘yicha respublika idoralararo komissiyasi ishchi organlari tomonidan davlat organlari va tashkilotlarida manfaatlar to‘qnashuviga yo‘l qo‘yilgan holatlar, ularni bartaraf etish, shuningdek, bunday holatlarning oldini olish bo‘yicha ko‘rilgan choralar haqida jamoatchilik xabardor qilib borilmoqda.

Shunga ko‘ra, Qoraqalpog‘iston Respublikasi Vazirlar Kengashi, Toshkent shahar, viloyatlar hamda tuman (shahar) hokimliklari xodimlarining manfaatlar to‘qnashuvini aniqlash va bartaraf etish yuzasidan malakasini oshirish maqsadida maxsus o‘quv treninglar, seminar va davra suhbatlari tashkil etilmoqda.

Xususan, Qoraqalpog‘iston Respublikasida 33 ta, Navoiyda 26 ta, Andijonda 18 ta, Namanganda 16 ta, Toshkent shahrida 14 ta davra suhbati, seminar, profilaktik suhbat va boshqa targ‘ibot tadbirlari o‘tkazilgan. Bu kabi tadbirlar Surxondaryo, Sirdaryo, Xorazm viloyatlarida ham amalga oshirilgan.

Shuningdek, mahalliy ijro etuvchi hokimiyat organlarida “Manfaatlar to‘qnashuvi to‘g‘risida”gi Qonun talablariga rioya etilishi ahvoli o‘rganildi.

Bunda 2025-yilning 2-yarmida hokimliklarning korrupsiyaga qarshi kurashish bo‘yicha tegishli bo‘linmalari tomonidan Navoiyda 17 ta (chora ko‘rilgan), Qashqadaryoda 16 ta (bartaraf etilgan), Jizzaxda 10 ta (bartaraf etilgan), Samarqandda 4 ta (bartaraf etilgan), Toshkent viloyatida 4 ta (chora ko‘rilgan), Namanganda 3 ta (chora ko‘rilgan), Buxoroda 3 ta (chora ko‘rilgan), Andijonda 2 ta (bartaraf etilgan) manfaatlar to‘qnashuvi holatlari aniqlanib, tegishli chora-tadbirlar amalga oshirilgan.

Shu bilan birga, Qashqadaryoda 38 ta, Jizzaxda 12 ta, Navoiyda 5 ta, Toshkent shahrida 3 ta holatda ma’muriy bayonnomalar rasmiylashtirilgan bo‘lsa, Samarqandda 5 ta holatda intizomiy jazo chorasi qo‘llanilgan.

Qo‘shimcha ravishda, manfaatlar to‘qnashuviga yo‘l qo‘ymaslik, mavjud kamchiliklarni bartaraf etish yuzasidan viloyat hokimliklari tomonidan quyi turuvchi tashkilotlarga topshiriq va ogohlantirish xatlari yuborilgan.

Bundan tashqari, mahalliy ijro etuvchi hokimiyat organlarida “Manfaatlar to‘qnashuvi to‘g‘risida”gi Qonun talablariga rioya etilishi ahvoli doimiy ravishda muhokama qilib borilgan. Misol uchun, Buxoro hamda Xorazm viloyati hokimliklarida har oy 1 martadan muhokama etilgan.