Butunjahon Intellektual Mulk Tashkiloti (BIMT) hamda Adliya vazirligi hamkorligida o‘tkazilayotgan “Ayollar yetakchiligidagi kichik va o‘rta biznes subyektlari uchun intellektual mulkni boshqarish klinikasi” loyihasining ikkinchi kuni bo‘lib o‘tdi.
2025-11-06 18:00:00 / Vazirlik yangiliklari
Bugun, 6-noyabr kuni Butunjahon Intellektual Mulk Tashkiloti (BIMT) hamda Adliya vazirligi hamkorligida o‘tkazilayotgan “Ayollar yetakchiligidagi kichik va o‘rta biznes subyektlari uchun intellektual mulkni boshqarish klinikasi” loyihasining ikkinchi kuni bo‘lib o‘tdi.
Dastur doirasida Qirg‘iziston va O‘zbekiston ayol tadbirkorlari o‘z mamlakatlaridagi muvaffaqiyatli tajriba va yutuqlari bilan o‘rtoqlashdilar. Shuningdek, biznesda intellektual mulk obyektlaridan samarali foydalanishning zamonaviy usullari bo‘yicha seminar-treninglar o‘tkazildi.
Kun davomida ishtirokchilar brendni rivojlantirish strategiyasini ishlab chiqish, BIMTning tadbirkorlik subyektlarini qo‘llab-quvvatlash dasturlari bilan tanishish va O‘zbekistonda ixtirochilar, novatorlar va brend egalari uchun yaratilgan imkoniyatlar mavzularida amaliy mashg‘ulotlarda qatnashdilar.
Ikki kun davom etgan mazkur tadbir ayollar rahbarligidagi korxonalar uchun intellektual mulkni boshqarish bo‘yicha mintaqaviy hamkorlikni kuchaytirish, innovatsion yondashuvlarni rivojlantirish hamda iqtisodiy o‘sishga ko‘maklashish yo‘lida muhim qadamlardan biri sifatida baholandi.
Dastur yakunida BIMT vakillari va loyiha ishtirokchilari intellektual mulkni biznesning muhim drayveri sifatida samarali qo‘llash masalalarida kelgusidagi hamkorlik istiqbollari haqida fikr almashdilar.