Buxoro viloyati hokimligi

Viloyat hokimi topshirigʻiga asosan, har bir rahbar oʻziga biriktirilgan hududdagi mahallaga borib yoshlar bilan, ayniqsa, ogʻir (“qizil”) toifadagi mahalla va ulardagi ehtiyojmand yoshlar bilan uchrashib, ularning tashvish-muammolarini bartaraf etish, yaqindan koʻmaklashishi maqsad qilingan. 

Shu nuqtayi nazardan, viloyat hokimining birinchi oʻrinbosari Botir Ahmedov Vobkent tumanidagi mahallalarida istiqomat qilayotgan shu toifadagi yoshlar bilan uchrashib, tegishli tashkilot va boshqarmalar boshliqlari, masʼul mutasaddilar bilan birga ular tashvish-muammolarini oʻrgandi.

Ogʻir (“qizil”) va ishsiz toifaga kiritilgan yoshlar bilan ishlash boʻyicha Vobkent tumani shtabida boʻlib oʻtgan yuzma-yuz muloqotda mamlakatimiz Prezidentining “Kambagʻallikdan farovonlik sari” dasturini amalga oshirish boʻyicha chora-tadbirlar toʻgʻrisida”gi PQ-330-sonli qarori ijrosini taʼminlash maqsadida tumanda “ijtimoiy reestrga” kiritilgan kam daromadli fuqarolarni daromadini oshirish, ishsiz fuqarolarning bandligini taʼminlash, ularni kambagʻallikdan chiqarish, ijtimoiy yordam koʻrsatish boʻyicha amalga oshirilayotgan ishlar, xorijdan oʻz layoqatiga mos, kafolatlangan mehnat sharoitlarida ishlashni istovchi mehnat migrantlariga yaratilayotgan shart-sharoit va boshqa masalalar yuzasidan fikr almashildi.  

Ayni kunda Vobkent tumanida yuqoridagi toifaga mansub mahallalarda 511 nafar ishsiz yigit-qiz roʻyxatga olingan boʻlib, bu yoshlarning 25 nafariga daromad manbaini yaratib berish, moddiy manfaatdorligini taʼminlash orqali ijtimoiy muhofazalash viloyat hokimining birinchi oʻrinbosari Botir Axmedovga biriktirilgan.

Shu nuqtayi nazardan, uchrashuv va samimiy suhbat soʻngida biriktirilgan yoshlar bilan ishlash boʻyicha “yoʻl xaritasi” tuzilib, ularning bandligini taʼminlash choralari koʻriladigan boʻldi. 

Viloyat hokimligi matbuot xizmati