Mustaqilligimizning 34 yillik ayyomi muborak boʻlsin!

Assalomu alaykum aziz yurtdoshlar!

Sizlarni mamlakatimiz mustaqilligining 34 yillik bayrami bilan samimiy tabriklayman!

Istiqlol va mustaqillik — har bir millatga oʻz erkini, oʻzligini, tinchlik va osoyishtaligini inʼom etuvchi buyuk neʼmat. Bugungi farovon kunlarimiz xalqimizning bukilmas irodasi, hamjihatligi, ertangi kuniga boʻlgan yuksak ishonchning yorqin namunasidir.

Muhtaram yurtboshimiz boshchiligida mard va olijanob xalqimizning fidokorona mehnatlari, orzu va intilishlari bilan Yangi Oʻzbekistonimizning buyuk kelajagi barpo etilmoqda. Yaxshi qoʻshnichilik, faol tashqi siyosat va mintaqaviy hamkorlik munosabatlari tobora rivojlanib, mamlakatimizning xalqaro maydondagi nufuzi yanada ortib bormoqda. 

Bu jarayonlarda, avvalo, Siz – fidoyi yurtdoshlarimizning mehnatingiz, fidokorona xizmatingiz va Vatan ravnaqiga qoʻshayotgan hissangiz beqiyosdir.

Soliq tizimida ham ochiqlik va shaffoflikka eʼtibor kuchaydi, tadbirkorlikni qoʻllab-quvvatlash, adolatli soliq siyosati orqali barqaror iqtisodiy rivojlanishni taʼminlash borasida salmoqli ishlar qilinmoqda. 

Davlatimiz rahbari mustaqilligimizning 34 yilligi munosabati bilan turli soha vakillarini yuksak davlat mukofotlari bilan taqdirlash toʻgʻrisidagi Farmonga imzo chekdi. Jumladan, soliq xizmati xodimlarining ham mashaqqatli mehnatlari munosib eʼtirof etildi. 

Bu yutuqlar albatta, soliq xizmati xodimlarining halol mehnatlari, davlat va jamiyat ravnaqi yoʻlida olib borayotgan mashaqqatli va samarali faoliyatiga berilgan yuksak bahodir. 

Aziz vatandoshlar!

Shu qutlugʻ kunlarda barchangizga  sogʻlik, omonlik, oilangizga fayz-u baraka tilayman. Osmonimiz doimo musaffo, yurtimiz tinchligi, xalqimiz saodati abadiy boʻlsin!

Bayramingiz muborak boʻlsin!

Hurmat bilan,

Sherzod Kudbiyev,
Soliq qoʻmitasi Raisi