Fiskal cheklarda MXIK va oʻlchov birliklaridan foydalanish masalalari muhokama qilindi
2024-08-22 14:30:00 / Qo'mita yangiliklari
Soliq qo‘mitasida onlayn-NKT (onlayn nazorat-kassa texnikalari) bo‘yicha Texnik xizmat ko‘rsatish markazlari (TXKM) vakillari bilan uchrashuv bo‘lib o‘tdi.
Tadbirkorlar tomonidan fiskal cheklarni berishda MXIK va o‘lchov birliklaridan noto‘g‘ri foydalanilayotgani, bu esa tovar aylanmasi hajmi va mahsulot tannarxi to‘g‘risidagi ma’lumotlarning buzib ko‘rsatilishiga olib kelayotgani kun tartibidagi asosiy masala bo‘ldi.
Soliq organlarining ma'lumotlar bazasiga kiritilgan "to‘ldirilmagan" cheklarga alohida e'tibor qaratildi. O‘rganish davomida ma’lum bo‘lishicha, ayrim tadbirkorlar tomonidan oflayn rejimda chop etilgan cheklar, onlayn rejimga ulanganda "to‘ldirilmagan" chek sifatida o‘tkaziladi. Bu cheklarni to'liq hisobini yuritish va nazoratga olishda nomuvofiqliklarni keltirib chiqaradi. Mutaxassislar bu masalani hal etish moliyaviy operatsiyalar shaffofligini ta’minlashda muhim ahamiyat kasb etishini ta’kidladi.
Muhokama chog‘ida onlayn-NKTga xizmat ko‘rsatish mas'uliyati TXKMLlarga yuklangani qayd etildi. Bu nafaqat texnik xizmat ko'rsatishni, balki dasturiy ta'minotni o'z vaqtida yangilash, shuningdek ularning to'g'ri ishlashini kuzatib borishni ham o'z ichiga oladi.
Soliq organlaridan xulosa olishda, tadbirkorlarga davlat reyestriga kiritish uchun qonun talablariga to‘liq javob beradigan modellar taqdim etiladi. Biroq, amalda ushbu standartlarga mos kelmaydigan qurilmalardan foydalanish holatlari aniqlanmoqda.
TXKM vakillariga foydalanilayotgan uskunalarning rasman tasdiqlangan namunalarga muvofiqligi ustidan nazoratni kuchaytirish va onlayn-NKT tizimi faoliyatidagi kamchiliklarni bartaraf etish zarurligi eslatildi. Bu haqdagi xabarnomalar ularga shaxsiy kabineti orqali ham yuborilmoqda.