"O‘zbekkosmos" agentligi

7–8-oktabr kunlari Toshkentda Xalqaro paxta kuni hamda dengizga chiqish imkoniyati bo‘lmagan rivojlanayotgan davlatlarning oziq-ovqat xavfsizligiga bag‘ishlangan anjuman bo‘lib o‘tdi. Unda FAO Bosh direktori Syuy Dunyu, ICAC ijrochi direktori Erik Traxtenberg, WTO Bosh direktori o‘rinbosari Jan-Mari Pogam, shuningdek, xalqaro tashkilotlar vakillari ishtirok etdi.

Anjumanda “O‘zbekkosmos” agentligi vakili “Aerokosmik texnologiyalar — oziq-ovqat va suv xavfsizligini ta’minlashning zamonaviy vositasi” mavzusida ma’ruza qildi. Unda O‘zbekistonning geografik sharoiti, aholi sonining o‘sishi hamda yer va suv resurslarining cheklanganligi sharoitida aerokosmik texnologiyalarning oziq-ovqat xavfsizligini ta’minlashdagi ahamiyati ta’kidlandi.

Kosmik tasvirlar va sun’iy intellekt asosida bug‘doy, paxta va boshqa ekinlarni tasniflash, ularning vegetatsiya jarayonini kuzatish, shuningdek, muammoli maydonlarni erta aniqlash imkoniyatlari namoyish etildi.

Qurg‘oqchilik, suv tanqisligi va yer degradatsiyasini kuzatishda Yerni masofadan zondlash ma’lumotlaridan foydalanish, axborot almashish hamda hamkorlikdagi yondashuvlarning mintaqaviy barqarorlik uchun muhimligi qayd etildi.

Aniq va o‘z vaqtida olingan ma’lumotlar oziq-ovqat xavfsizligini ta’minlashning muhim resursi ekani, kosmik texnologiyalar esa cheklangan yer va suv resurslarini samarali boshqarish, oziq-ovqat xavfsizligini mustahkamlash hamda tabiiy resurslarni kelgusi avlodlar uchun asrashga xizmat qilishi ta’kidlandi.

Anjuman doirasida “O‘zbekkosmos” agentligi vakillari xorijiy va mahalliy kompaniyalar rahbarlari hamda vakillari bilan qator ishchi uchrashuvlar o‘tkazib, o‘zaro manfaatli hamkorlikni rivojlantirish, qo‘shma loyihalarni amalga oshirish va istiqbolli yo‘nalishlarni muhokama qildilar.