"O‘zbekkosmos" agentligi

9–10-sentabr kunlari Parijdagi Grand Palais majmuasida Fransiya Prezidenti Emmanuel Makron tashabbusi bilan ilk Xalqaro kosmik sammit bo‘lib o‘tdi. Unda 90 ta davlat va xalqaro tashkilot, 60 ga yaqin yuqori darajadagi hukumat vakillari, 1000 dan ortiq kosmik kompaniya va 14 davlatdan 19 nafar taniqli astronavtlar ishtirok etishdi.

Sammitda "O'zbekkosmos" agentligi vakillari ham ishtirok etib uchrashuv va muzokaralarda qatnashishdi. Muloqotlar davomida ilg‘or tajriba almashish, yangi hamkorlik yo‘nalishlarini belgilash va kosmik sohadagi istiqbolli loyihalarni muhokama qilishga alohida e’tibor qaratildi.

Yuqori darajadagi ishtirokchilar qatorida Ruanda Prezidenti Pol Kagame, Kongo Respublikasi Prezidenti Denis Sassu-Ngesso, Jibuti Prezidenti Ismoil Umar Gelle, Gretsiya Bosh vaziri Kiriakos Mitsotakis, Chexiya Bosh vaziri Petr Fiala, Armaniston Bosh vaziri Nikol Pashinyan, Yevropa Komissiyasi raisi Ursula fon der Leyen, Yevropa Komissiyasi ijrochi vitse-prezidentlari Xenna Virkkunen va Stefan Sejourne, shuningdek, Yevropa Ittifoqining mudofaa va kosmos masalalari bo‘yicha komissari Andryus Kubilyus ishtirok etmoqda.

Sammitning birinchi kunida Fransiya Prezidenti Emmanuel Makron, Gretsiya Bosh vaziri Kiriakos Mitsotakis, Chexiya Bosh vaziri Petr Fiala hamda boshqa yuqori martabali rasmiylar kosmik sohaning rivojlanishi, xalqaro hamkorlik, kosmik xavfsizlik va Yevropaning kosmik sohadagi strategik ustuvor yo‘nalishlariga bag‘ishlangan nutqlar bilan so‘zga chiqdi. Birinchi kun doirasida, shuningdek, astronavtlar ishtirokida davra suhbati o‘tkazilib, unda Emmanuel Makron ham qatnashdi.

Sammitning ikkinchi kunida rasmiy dastur doirasida Fransiya Prezidenti Emmanuel Makron va Yevropa Komissiyasi raisi Ursula fon der Leyen nutq so‘zladi. Shuningdek, Xalqaro kosmik stansiya bilan fransuz astronavti Sofi Adeno ishtirokida jonli aloqa seansi tashkil etildi hamda Yevropa kosmik agentligining taqdimoti namoyish qilindi.

Sammit doirasida “Tez o‘zgarayotgan dunyo uchun yangi kosmik makon”, “Kosmik xavfsizlik: Yevropadan javoblar” va “Kelajakdagi kosmik infratuzilma haqidagi qarashlar” mavzularida davra suhbatlari o‘tkazildi. Bundan tashqari, “Afrika yetakchilarining kosmosga oid qarashi” mavzusida alohida davra suhbati tashkil etilib, unda Ruanda Prezidenti Pol Kagame ishtirok etdi.

Sammit davomida “Global kosmik iqtisodiyot”, “Xavfsizlik va hamkorlik” hamda “Fan va tadqiqotlar” yo‘nalishlari bo‘yicha parallel panel muhokamalari tashkil etildi. Jumladan, Yevropa kosmik agentligi Bosh direktori Jozef Ashbaxer ishtirokida “O‘zgarayotgan kosmik muhitda tarixiy tashkilotlarni transformatsiya qilish” mavzusida panel muhokamasi o‘tkazildi.

Shuningdek, sammitda 14 ta davlatdan 19 nafar taniqli astronavt, jumladan Fransiyadan Toma Peske, Italiyadan Samanta Kristoforetti va Luka Parmitano, Germaniyadan Aleksandr Gerst va Mattias Maurer, Birlashgan Arab Amirliklaridan Sulton Al-Neyadi, Turkiyadan Alper Gezeravji va boshqalar ishtirok etmoqda.

Sammit kosmik sohada xalqaro hamkorlikni kuchaytirish, Yevropaning kosmik sohadagi raqobatbardoshligi va strategik mustaqilligini oshirish, yangi texnologiyalarni rivojlantirish hamda kosmik makondan tinch va barqaror foydalanish bo‘yicha umumiy yondashuvlarni shakllantirish uchun muhim xalqaro platforma sifatida namoyon bo‘lmoqda.