Qashqadaryoda kosmik texnologiyalarni joriy etish bo‘yicha hamkorlik kengaymoqda
2026-07-08 19:20:00 / Yangiliklar
So‘nggi yillarda Prezidentimiz tashabbusi bilan mamlakatimizda kosmik faoliyatni rivojlantirish, zamonaviy kosmik texnologiyalarni iqtisodiyot tarmoqlariga keng joriy etish hamda hududlarni raqamli boshqarish tizimlarini takomillashtirish borasida izchil islohotlar amalga oshirilmoqda.
Ushbu ustuvor vazifalar ijrosi doirasida Qashqadaryo viloyati hokimi Murotjon Azimov “O‘zbekkosmos” agentligi tomonidan 2026-yilda viloyatda amalga oshirilayotgan ishlar hamda istiqboldagi loyihalar yuzasidan taqdimot bilan tanishdi.
Taqdimotda Kosmik tadqiqotlar va texnologiyalar agentligi rahbariyati, soha mutaxassislari, shuningdek, viloyatdagi tegishli tashkilotlar rahbarlari ishtirok etdi.
Tadbir davomida sun’iy yo‘ldosh ma’lumotlari asosida qishloq xo‘jaligi yerlarini monitoring qilish, suv resurslarini samarali boshqarish, ekologik nazoratni kuchaytirish, qurilish va hududlarni rejalashtirish hamda boshqa yo‘nalishlarda kosmik texnologiyalarni keng qo‘llash masalalari muhokama qilindi. Shuningdek, hududda amalga oshirilayotgan loyihalar natijalari va kelgusidagi ustuvor rejalar yuzasidan fikr almashildi.