"O‘zbekkosmos" agentligi

“Oʻzbekkosmos” agentligida Fransiyaning O‘zbekiston Respublikasidagi Favqulodda va Muxtor elchisi Ualid Fuk bilan uchrashuv bo‘lib o‘tdi. Unda ikki tomonlama hamkorlik istiqbollari muhokama qilindi hamda kosmik sohadagi mavjud aloqalarni yanada rivojlantirish masalalari ko‘rib chiqildi.

Uchrashuv davomida “Oʻzbekkosmos” agentligi direktori Sh.Kadirov tomonidan O‘zbekiston va Fransiya o‘rtasidagi kosmik sohadagi hamkorlikning bugungi holati haqida ma’lumot berildi. Xususan, Fransiyaning Novaspace konsalting kompaniyasi bilan “Kosmik tadqiqotlar va texnologiyalar – 2030” strategiyasini ishlab chiqish bo‘yicha hamkorlik doirasidagi ishlar, 2022–2023-yillar davomida Fransiyaning moliyaviy ko‘magida va “Airbus” kompaniyasi bilan hamkorlikda O‘zbekistonda qishloq xo‘jaligiga Yerni masofadan zondlash (YMZ) sun’iy yo‘ldosh texnologiyalarini joriy etishga qaratilgan “GeoFerma” qo‘shma loyihasi bo‘yicha amalga oshirilayotgan chora-tadbirlar ko‘rib chiqildi.

Shu bilan birga, CNES (Fransiya Milliy kosmik tadqiqotlar markazi) bilan hamkorlik istiqbollariga ham to‘xtalib o‘tildi.

Tomonlar 2026-yilning 30–31-yanvar kunlari Fransiya elchixonasi bilan hamkorlikda ActInSpace xalqaro xakatonining milliy bosqichi muvaffaqiyatli o‘tkazilganini alohida qayd etdilar. Shuningdek, Agentlik tomonidan amalga oshirilayotgan boshqa ta’lim loyihalari – “Yosh muhandis”, “NASA Space Apps Challenge” va boshqa tashabbuslar haqida ham fikr almashildi.

Bundan tashqari, 2026-yil 31-mart – 1-aprel kunlari Toshkent shahrida o‘tkaziladigan STC (Space Technology Conference) tadbirida ko‘plab fransuz kompaniyalari ishtirok etishi kutilayotgani ta’kidlandi. Elchi janoblariga 2028-yilda Samarqand shahrida o‘tadigan “Xalqaro astronavtika kongressi – IAC–2028” mezbonligi uchun o‘tkazilgan tanlov jarayonida Fransiyaning CNES tomonidan bildirilgan qo‘llab-quvvatlov uchun minnatdorlik bildirildi.

Fransiya elchisi O‘zbekiston va Fransiya o‘rtasidagi do‘stona va strategik munosabatlarni yuqori baholadi. Shuningdek, elchi joriy yil iyul oyida Parij shahrida yuqori darajadagi rahbarlar ishtirokida Xalqaro kosmik sammit o‘tkazilishi rejalashtirilganini ma’lum qilib, mazkur tadbirda Agentlik delegatsiyasini ishtirok etishga taklif etdi. Bundan tashqari, elchi CNES bilan hamkorlikda malaka oshirish treninglarini tashkil etishda ko‘mak berishga hamda O‘zbekistonning yetakchi oliy ta’lim muassasalari bilan kosmik ta’lim dasturlarini yo‘lga qo‘yish imkoniyatlarini ham o‘rganishga tayyorligini bildirdi.

Uchrashuvda tomonlar 6U formatdagi sun’iy yo‘ldosh loyihasi, milliy fazogirni tayyorlash istiqbollari hamda boshqa joriy loyihalar yuzasidan fikr almashdilar.

Uchrashuv yakunida Agentlik direktori 2026-yil 24–26-mart kunlari Parij shahrida bo‘lib o‘tadigan IAF Spring Meetings tadbirida ishtirok etish maqsadida Agentlik rahbariyati tashrifi rejalashtirilayotganini ma’lum qildi. Tomonlar o‘zaro hamkorlikni kengaytirish, amaliy yo‘nalishlar bo‘yicha ishlarni faollashtirish hamda muloqotni davom ettirishga kelishib oldilar.